Arsenali i Mikel Artetës po planifikon një lëvizje ambicioze, për të sjellë në Emirates talentin e Manchester United, Marcus Rashford. Trajneri Arteta ka nevojë për një sulmues me eksperiencë, pas largimit nga klubi të Pierre-Emerick Aubameyang drejt Barcelonës. Rashford është ndër alternativat kryesore në listën e drejtuesëve të klubit.
Arsenal u linkua me disa emra sulmuesish në merkaton e janarit, por në atë kohë emri i Marcus nuk ishte në listën e klubit. Gjithsesi, një incident i ndodhur së fundmi, mes Rashford dhe tifozëve të United, ka krijuar tension mes tij dhe “Djajëve të Kuq”, duke shtyrë akoma më shumë skenarët për një largim të mundshëm në verë.
Sipas raportimeve në Angli, pas humbjes ndaj Atletico Madrid në Champions League, Rashford u tregoi gishtin e mesit disa tifozëve të Manchester United, që kritikuan paraqitjen e tij në fushë. Pas këtij incidenti, lojtari u detyrua të sqaronte fansat dhe opinionin publik në rrjetet e tij sociale. Por, kjo nuk ndali thashethemet për një krisje të marrëdhënieve mes tij dhe United.
Rashford ka dhe 1 vit të mbetur në kontratën e tij aktuale me klubin, me opsion për të rinovuar dhe për 1 vit tjetër. Megjithatë, ai e ka humbur vendin e titullarit tek “Djajtë e Kuq”, pas ardhjes së Ralf Rangnick në krye të pankinës.
Lojtari është aktivizuar si titullar në vetëm 9 takime në Premier League këtë sezon. Ai ka shënuar vetëm 5 gola në të gjitha kompeticionet. Nëse Arsenal ia del të kualifikohet në Champions League sezonin e ardhshëm, kjo do t’i jepte Rashford një mundësi për të gjetur dhe një herë formën e tij më të mirë. Manchester United ndërkohë ka shumë pak shanse që të sigurojë një vend në katërshen më të mirë në kampionat këtë sezon.
