Drejtuesit e Manchester United presin që Cristiano Ronaldo dhe Luke Shaw të largohen në fund të sezonit. Një burim i afërt pranë klubit i ka bërë me dije prestigjozes Football Insider, se United po përgatitet për sezonin e ardhshëm, duke marrë parasysh skenarin ku Shaw dhe CR7 nuk janë më pjesë e skuadrës.
Ronaldo nuk është i lumtur me situatën në të cilën ndodhet United. Sipas të gjitha gjasave ekipi nuk do të kualifikohet në Champions League sezonin e ardhshëm, dhe kjo është një arsye mëse e mjaftueshme që portugezi të ndihet i pakënaqur në Old Trafford. Duke marrë parasysh këtë situatë, Porto është duke përgatitur një ofertë të majme për të joshur Cristiano që të rikthehet përsëri në Portugali.
CR7 ka shënuar 18 gola dhe ka regjistruar 3 asiste që prej rikthimit të tij tek United. Statistikat janë mjaft të kënaqshme për një lojtar 37 vjeçar, por niveli i përgjithshëm i skuadrës lë për të dëshiruar.
Në të njejtën kohë, e ardhmja e Luke Shaw tek United është gjithashtu në dyshim. Mbrojtësi është përfolur disa herë për një largim të mundshëm nga klubi, por deklarata e tij në fitoren 2-1 të Anglisë ndaj Zvicrës, la të kuptohej se Shaw nuk ndihet i lumtur te “Djajtë e Kuq”. Lojtari u shpreh:
“Gjithmonë është e rëndësishme të ndihesh sikur kanë nevojë për ty.”
Shaw po kalon një sezon të vështirë tek United, teksa hapësirat për të kanë qënë të kufizuara. Sipas ish-portierit Paul Robinson, mbrojtësi nuk ka ndërmend të nënshkruajë një kontratë të re, të paktën derisa të caktohet trajneri i ri i klubit. Ky i fundit mund të bindë Shaw të qëndrojë duke i ofruar atij më shumë hapësira, por deri tani, lojtari është i prirur të konsiderojë fort mundësinë e largimit.
