Sipas Dean Jones, Manchester City mund të heqë dorë nga Riyad Mahrez në verë, në mënyrë që të mbajë në ekip brazilianin Gabriel Jesus. Ky i fundit është përfolur për një largim të mundshëm në fund të sezonit, por mesa duket kampionët në fuqi të Anglisë nuk janë ende të gatshëm të heqin dorë prej Jesus.
Për këtë arsye Guardiola është i gatshëm të sakrifikojë Mahrez, i cili është aktivizuar në vetëm 17 nga 33 ndeshje të City në kampionat, këtë sezon. Qytetarët janë ekipi favorit për të siguruar shërbimet e Erling Haaland në verë, dhe kjo do të thotë se Jesus apo Mahrez duhet të largohen për shkak se nuk do të gjejnë hapësira në Etihad. Kontrata e Mahrez skadon në vitin 2023 dhe City rrezikon të humbasë me kosto zero sulmuesin. Duke u nisur nga kjo, drejtuesit e klubit mund të zgjedhin të përfitojnë financiarisht nga kartoni i Riyad Mahrez. Por situata është e njejtë dhe me Jesus.
Jones deklaroi për GIVEMESPORT:
“Nëse dikush do të largohet nga sulmi i City, sipas informacioneve që kam, Mahrez është ai që mund të sakrifikohet.”
Duke parë me vëmendje statistikat, Mahrez ka performuar në përgjithësi më mirë se shoku brazilian i skuadrës. Por avantazh i fortë i Jesus është forma e tij në javët e fundit. Lojtari ka shënuar 5 gola në 2 ndeshjet e fundit, duke demonstruar dhe një herë tjetër talentin e tij. Një tjetër avantazh i Jesus ndaj Riyad Mahrez është mosha. Braziliani është 25 vjeç ndërsa Mahrez 31. Kjo do të thotë se Jesus ka më shumë hapësira dhe mundësi për t’u zhvilluar ende si lojtar.
Duke marrë parasysh rrethanat, vendimin se kush do të largohet do ta marrë trajneri Guardiola, por ende nuk është 100% e sigurt se cili prej lojtarëve ka fituar besimin e spanjollit.
