Portugalia mposhti Ganën me rezultatin 3-2, në ndeshjen e vlefshme për grupin H të botërorit. Portugezët dominuan takimin në pjesën më të madhe, pavarësisht se gjetën golin e avantazhit vetëm në minutën e 65’ të sfidës. Ishte pikërisht Cristiano Ronaldo, i cili me një penallti mjaft të kontestuar zhbllokoi rezultatin, duke vendosur dhe një rekord fantastik.
CR7 u bë zyrtarisht lojtari i parë që ka shënuar gol në 5 Kupa të ndryshme Bote. Në përfundim të takimit sulmuesi u shpreh mjaft i lumtur për rekordin, dhe sigurisht dhe fitoren:
“Ishte një javë që mbylli një kapitull, është e mbyllur.” – Tha Ronaldo duke iu referuar fillimisht ndërprerjes së kontratës së tij me Manchester United. Më pas superstari shtoi:
“Ne fituam dhe unë isha në gjendje të ndihmoja ekipin, pjesa tjetër nuk ka rëndësi. Ky ishte një moment i bukur, botërori im i pestë. Arritëm të fitojmë, e nisëm me këmbën e mbarë dhe është një fitore vërtet e rëndësishme. Ndeshja e parë është deçizive në kompeticione të tilla…Fakti se jam lojtari i parë që ka shënuar në 5 botërore më bën krenar.”
Përsa i përket kronikës së ndeshjes, Gana gjeti shumë shpejt barazimin me Andre Ayew në minutën e 73’, por superioriteti i portugezëve nuk u vu asnjëherë në dyshim. Portugalia kaloi përsëri në avantazh vetëm 5 minuta pas golit të kundërshtarëve me anë të Joao Felix. Rafael Leao gjithashtu gjeti rrugën e rrjetës vetëm 2 minuta më vonë, duke shënuar të tretin për portugezët. Gana ia doli të ngushtonte diferencën me një gol të Osman Bukari në minutën e 89’, por rezultati 3-2 nuk do të ndryshonte deri në fund të takimit.
Ndërkohë, trajneri i Portugalisë, Fernando Santo, gjithashtu i thurri lëvdata sulmuesit në përfundim të sfidës. Santo komentoi:
“Një nga lojtarët më të mirë në botë, nga më të mirët e të gjitha kohërave. Cristiano Ronaldo është një fenomen…Ne do të jemi duke folur për të edhe pas 50 vitesh.”
