Tottenhami i trajnerit Conte nuk shkoi më shumë sesa barazimi 2-2 ndaj Brentford, në sfidën e parë të londinezëve, pas botërorit të Katarit. Spursat rrezikuan të humbisnin takimin, teksa iu desh të përmbysnin rezultatin 2-0 për të siguruar 1 pikë në Gtech Community Stadium.
Të zotët e shtëpisë kaluan në avantazh që në minutën e 15’ të pjesës së parë me anë të Janelt. Portieri Fraser Forster ndali fillimisht goditjen e Mathias Jensen, por topi u ndal në këmbët e Janelt dhe ky i fundit e pati mjaft të lehtë të dërgojë topin në rrjetë nga distanca e afërt. Pjesa e parë u mbyll me avantazhin minimal të Brentford.
Në të dytën të zotët e shtëpisë dyfishuan rezultatin në minutën e 54’. Kësaj rradhe autor ishte Toney, i cili u tregua mjaft i vëmendshëm duke shfrytëzuar konfuzionin e mbrojtjes së Tottenham gjatë një goditje këndi. Megjithatë, 2 gola rezultuan të pamjaftueshëm për t’i dhuruar Brentford fitoren.
Superstari i Tottenham, Harry Kane, shkurtoi diferencën në vetëm 1 gol në minutën e 65’ të ndeshjes. Anglezi shënoi një gol mjaft të bukur me kokë pas krosimit perfekt të Clement Lenglet. Vetëm 6 minuta më vonë, Pierre-Emile Hojbjerg shënoi të dytin për Tottenham me një goditje të bukur me hark. Kane pati një tjetër rast të mirë në minutat e fundit për të fituar ndeshjen, por sfida u mbyll në barazim 2-2 dhe skuadrat ndanë 1 pikë me njëra-tjetrën.
Rezultati do të thotë se ekipi i Conte vazhdon të ruajë vendin e katërt në renditje, por ka zhvilluar 2 ndeshje më shumë se rivalët e Manchester United, që ndodhen në vendin e pestë dhe kanë vetëm 4 pikë më pak se londinezët. Gara për një vend në Champions League sezonin e ardhshëm po bëhet gjithnjë e më e ashpër.
