Sulmuesi amerikan i Chelsea, Christian Pulisic, ëshë shumë pranë një transferimi tek italianët e AC Milan. Marrëveshja pritet të zyrtarizohet së shpejti, teksa sipas mediave angleze, kuqezinjtë e Milan do t’i paguajnë Chelsea 20 milionë paundë për kartonin e lojtarit. Pulisic duket se nuk bën pjesë në planet e bluve për sezonin e ardhshëm, dhe tek Milan ka shanse më të mira për të siguruar vendin e titullarit.
Kujtojmë se Pulisic iu bashkua Chelsea nga Borussia Dortmund në vitin 2019 për shifrën e 57.6 milionë paundëve. Lojtari shënoi 26 gola në 145 takime me klubin anglez, por dështoi të kishte impaktin e pritur prej tij në Stamford Bridge. Gjithsesi, amerikani ia doli të fitonte Champions League në vitin 2021, duke u aktivizuar dhe në finalen ndaj Manchester City.
Christian Pulisic do t’i bashkohet shokut të tij të skuadrës tek Milan, Ruben Loftus-Cheek, i cili gjithashtu la Chelsea për t’iu bashkuar ekipit italian. Mesfushori u shpreh se nuk ishte i kënaqur me rolin e tij dhe pozicionet ku po aktivizohej në fushë, dhe kjo ishte arsyeja kryesore e largimit. Londinezët gjithashtu vendosën që David Datro Fofana të luajë si i huazuar këtë sezon tek Union Berlin në Bundesliga. Sulmuesi i talentuar nga Bregu i Fildishtë u aktivizua vetëm 4 herë me Chelsea, që pas transferimit të tij nga Molde në merkaton e janarit.
Ndërkohë, drejtuesit e Chelsea kanë zgjedhur të largojnë dhe disa emra të tjerë këtë merkato vere, mes tyre dhe titullarë, përfshirë këty Kai Havertz, Mason Mount dhe Mateo Kovacic. Cesar Azpilicueta gjithashtu la klubin për t’iu bashkuar Atletico Madrid, pas një karriere të gjatë në Stamford Bridge. Ndërkohë, Kalidou Koulibaly, Edouard Mendy dhe Kante gjithashtu vendosën të largohen nga Chelsea, për të nisur një aventurë të re në Arabi.
