Legjenda e Chelsea, John Terry, është shumë pranë caktimit si trajneri i ri Al-Shabab. Anglezi ka qënë prej kohësh në komunikim me klubin arab, dhe sipas mediave angleze, palët kanë arritur në një marrëveshje verbale. Terry i është ofruar një kontratë 2 deri në 4 vjecare, ndërkohë që momentalisht ish-lojtari po punon si konsulent pranë akademisë së Chelsea.
Klubi ka bërë me dije se nuk do të pengojë John që të shkëputet, në shenjë respekti për kontributin e tij prej më shumë se dy dekadash në Stamford Bridge. Al-Shabab ndërkohë nuk konsiderohet një nga klubet e rëndësishme në Arabi, por ambiciet e drejtuesëve janë të mëdha. Janë pikërisht këta të fundit që e shohin Terry si personin e duhur jo vetëm për zhvillimin e klubit, por dhe për të afruar emra më të njohur në skuadër. Kujtojmë se anglezi është lojtari më i suksesshëm në historinë e Chelsea, me plot 5 tituj kampionë në Premier League, 5 tituj në FA Cup, si dhe një triumph në Champions League.
Që prej shkëputjes nga futbolli i luajtur, Terry ka qënë i vendosur për t’iu përkushtuar karrierës si trajner, por deri më tani nuk ka mundur të sigurojë një ofertë nga një klub profesional. Anglezi ka punuar si asistent pranë teknikut Dean Smith tek Leicester, si dhe tek Aston Villa, por tashmë kërkon të hedhë hapin e rradhës në karrierën e tij.
Ish-shoku i tij i skuadrës tek kombëtarja angleze, Steven Gerrard, momentalisht është në krye të pankinës tek Al-Ettifaq, ndërkohë që një tjetër ish-lojtar i Liverpool, gjithashtu është trajner në ligën arabe. Bëhet fjalë për ish-sulmuesin Robbie Fowler, i cili është në krye të Al-Qadsiah.
Mbetet të shohim nëse Terry do të firmosë përfundimisht me Al-Shabab, dhe nëse po, cilat do të jenë kushtet e kontratës.
