Kevin De Bruyne pritet të qëndrojë tek Manchester City edhe sezonin e ardhshëm. Lajmi është bërë i ditur nga mediat angleze këtë fundjavë. Përfaqësues të lojtarit janë takuar me përfaqësues të klubeve arabe këtë javë, por duket se asi i Manchester City nuk do të transferohet në kampionatin arab, të paktën këtë verë.
32 vjeçari mendohet se nuk tërhiqet nga kontratat e majme të ligës arabe dhe për të aspekti financiar nuk është i rëndësishëm në këtë pikë të karrierës. Megjithatë, Al Hilal po ndjek tashmë prej kohësh situatën e De Bruyne. Drejtuesit e klubit thuhet se janë adhurues të mëdhenj të belgut, dhe po përpiqen të bindin atë që të luajë në kampionatin arab.
Por duket se mesfushori ka plane të tjera. Burime të afërta pranë lojtarit bëjnë me dije se Kevin ndien se ende mund të kontribuojë tek Manchester City, dhe mund të luajë futboll në nivele të larta. Në përfundim të karrierës me “qytetarët” lojtari sheh Amerikën si destinacionin e tij të rradhës, dhe preferon të luajë në kampionatin MLS.
Për momentin, San Diego FC është klubi amerikan që ka komunikuar me agjentë të lojtarit, për të diskutuar një transfertë në të ardhmen. Megjithatë, kur ky moment të vijë, De Bruyne pritet të ketë dhe oferta nga klube të tjera në MLS.
Trajneri i Manchester City, Pep Guardiola gjithashtu komentoi për interesimin e klubeve arabe për Kevin De Bruyne. Tekniku spanjoll u shpreh:
“Kjo është një pyetje për të. Do të doja shumë që ai të qëndronte, por nuk e di. Dëgjoj shumë lajme por nuk e di nëse ai ka marrë një ofertë, nuk e di nëse Arabia Saudite e kërkon. Do të doja shumë që ai të qëndronte këtu, por secili bën zgjedhjen e vet.”
