Drejtuesit e Manchester United duket se kanë rënë dakord për termat personale, me talentin hollandez të Bologna, Joshua Zirkzee. Sipas burimeve të mediave angleze, “Djajtë e Kuq” dhe lojtari kanë arritur një akord personal, dhe tashmë 2 klubet duhet të gjejnë akordin përsa i përket financave dhe detajeve të tjera të marrëveshjes. Sulmuesi ka një klauzolë për prishjen e kontratës prej 34 milionë paundësh, një shifër që është brenda mundësive financiare të United.
Trajneri i klubit, Erik ten Hag, e sheh si mjaft të rëndësishëm afrimin e lojtarit në Old Trafford. Sezonin e kaluar Manchester United pati vështirësi të mëdha për të finalizuar rastet e krijuara për gol, teksa Marcus Rashford dhe Rasmus Hojlund kaluan një sezon të vështirë. Zirkzee ndërkohë impresionoi me paraqitjet e tij me Bologna në Serie A, dhe hollandezi ka akoma më shumë mundësi për t’u përmirësuar si lojtar, në Premier League.
Ndërkohë United nuk është i vetmi klub në garë për shërbimet e sulmuesit të talentuar. Arsenal është duke monitoruar situatën, ndërkohë që Milan në Itali gjithashtu kërkon të bëjë të vetin sulmuesin. Kuqezinjtë megjithatë janë duke eksploruar dhe opsione të tjera përsa i përket sulmit, duke qënë se për ta do të jetë e vështirë të konkurrojnë me Manchester United.
Përsa i përket preferencës së vet lojtarit, Zirkzee gjithashtu preferon një transferim në Old Trafford. Kjo dhe për shkak të trajnerit Ten Hag i cili ka besim tek aftësitë e tij. Duke qënë se ndeshjet para sezonale për shumicën e klubeve fillojnë duke nisur nga java e ardhshme, drejtuesit e United duan të mbyllin sa më shpejt transferimin e Zirkzee. Megjithatë zyrtarizimi i hollandezit është ende larg. Bordi i “Djajëve të Kuq” është duke punuar dhe për objektiva të tjerë në merkato, mes tyre Jarrad Branthwaite dhe Matthijs de Ligt.
