Pas lajmeve për një largim të mundshëm të Kevin de Bruyne drejt Arabisë Saudite, trajneri i Manchester City, Pep Guardiola, ka komentuar mbi situatën. Tekniku spanjoll ka qetësuar fansat e “qytetarëve” duke thënë se mesfushori nuk do të largohet nga Etihad, të paktën për sezonin e ardhshëm.
De Bruyne ka dhe 1 vit të mbetur në kontratën e tij aktive me Manchester City, dhe ende nuk ka informacion nëse lojtari është në bisedime me klubin për një rinovim të mundshëm. Muajin e kaluar, mesfushori i talentuar konfirmoi për mediat se në rastin e një oferte nga Arabia Saudite, ai duhet ta konsiderojë atë, duke marrë parasysh moshën e tij si dhe benefitet e jashtëzakonshme financiare. Gjithsesi, duket se Guardiola nuk është i shqetësuar për këtë gjë. Pep u shpreh për mediat së fundmi:
“Kevin nuk do të largohet…Nëse dikush vendos të largohet do të duhet të bisedojmë për këtë, por sigurisht, deri në fund të merkatos ka gjithmonë mundësi. Nuk përjashtoj mundësinë e afrimit të lojtarëve të rinj, por mendoj se ka 85, 90, 95 % mundësi që do të luajmë me të njejtën skuadër.”
Kujtojmë se Manchester City do të luajë përballë Chelsea në sfidën e parë të sezonit në Premier League. De Bruyne ngriti lart titullin e katërt kampion rradhazi në Angli sezonin që lamë pas, duke konfirmuar dhe një herë tjetër veten si një nga më të mirë në Premier League. Lojtari ka fituar 6 herë gjithsej trofeun prestigjoz.
Ndërkohë mes lojtarëve të tjerë që potencialisht mund të largohen nga City këtë verë është dhe portieri Ederson. Braziliani është përfolur gjithashtu për një largim drejt Arabisë Saudite, por ende nuk ka diçka konkrete. Përsa i përket afrimeve të reja, City ende nuk ka hedhur një hap në këtë drejtim.
