Sipas burimeve në mediat angleze, drejtuesit e Atletico Madrid kanë besim të lartë, se mund të transferojnë Conor Gallagher në Madrid. Gjigandët spanjollë po kryesojnë garën për kartonin e anglezit, i cili është gjithashtu nën shënjestrën e Tottenham. Klubet janë në kontakt dhe spanjollët janë mjaft konfidentë se Gallagher do të luajë për trajnerin Simeone, duke nisur nga sezoni i ardhshëm.
Chelsea ndërkohë është fokusuar tek talentet e reja këtë merkato, dhe blutë e Londrës ende nuk kanë bërë një blerje të madhe. Në të njejtën kohë, klubi po fokusohet në largimin e lojtarëve që nuk shihen si pjesë e vizionit të ekipit për të ardhmen. Megjithëse Conor Gallagher ishte një nga lojtarët më të mirë për Chelsea sezonin që lamë pas, duket se anglezi mund të largohet nga Stamford Bridge.
Mediat angleze gjithashtu kanë raportuar se Gallagher ka biseduar me disa miq të tij, për jetën dhe futbollin në Spanjë, teksa lojtari po përpiqet të vendosë mbi hapin e rradhës në karrierën e tij. Një prej tyre është Kieran Trippier, i cili është aktivizuar më parë me Atletico Madrid, dhe fitoi kampionatin me madrilenët në vitin 2021. Mbrojtësi anglez thuhet se është i mendimit se një lëvizje në Spanjë do të ishte mjaft e mirë për Gallagher.
Conor Gallagher ka qënë dhe një nga pikat që sollën largimin e trajnerit Mauricio Pochettino nga Chelsea. Tekniku argjentinas ishte i mendimit se mesfushori anglez ishte mjaft i rëndësishëm në Stamford Bridge dhe nuk mund të shitej. Bordi drejtues i Chelsea ndërkohë ishte i një tjetër mendimi dhe tashmë Conor është shumë afër largimit.
Në rastin e zyrtarizimit të transferimit tek Atletico, Gallagher do të ketë shancin të luajë në Champions League, mundësi kjo e pamundur për t’u realizuar tek Chelsea, të paktën sezonin e ardhshëm.
