Mediat angleze kanë raportuar se Jose Mourinho kërkon të sjellë tek Fenerbahce, mesfushorin e Tottenham, Giovani Lo Celso. Tekniku portugez është në kërkim të përforcimeve këtë merkato vere, teksa Fenerbahce synon titullin kampion në Turqi. Lo Celso duke një alternativë mjaft e mirë për klubin turk, teksa lojtari ka humbur rolin e titullarit tek Tottenham.
Kujtojmë se Jose Mourinho ka trajnuar Lo Celso gjatë kohës kur ishte trajner i Tottenham, mes viteve 2019 dhe 2021. “The Special One” e njeh mjaft mirë lojtarin dhe është i bindur se Celso do të ishte një aset mjaft me vlerë për ekipin e tij. Largimet e Miguel Crespo, Rade Krunic dhe Miha Zajc nga klubi turk do t’i japin Fenerbahce fondet e duhura për t’u hedhur në sulm për Lo Celso, teksa përfaqësuesit e lojtarit gjithashtu mendohet se janë pozitivë për të arritur në një marrëveshje. Diskutimet mes lojtarit dhe klubit janë duke u zhvilluar, dhe argjentinasi e pëlqen idenë e të luajturit futboll përsëri, për Jose Mourinho.
Kontrata e Lo Celso skadon për 10 muaj dhe Tottenham nuk do të donte kurrsesi të humbiste lojtarin me kosto zero. Sidomos duke marrë parasysh faktin se klubi londinez pagoi plot 55 milionë paundë për të sjellë mesfushorin në ekip nga Real Betis, 5 vite më parë.
Sezonin që lamë pas, Lo Celso u aktivizua në 22 ndeshje në Premier League me Tottenham. Megjithatë, argjentinasi ishte titullar në vetëm 4 prej këtyre sfidave. Lo Celso gjithashtu kaloi një periudhë huazimi tek Villarreal, por klubi spanjoll nuk shprehu interes për të blerë kartonin e lojtarit. Më përpara, mesfushori është linkuar dhe me një transferim tek Aston Villa, pasi trajneri Unai Emery ka shprehur simpatinë e tij për argjentinasin. Gjithsesi, kjo nuk pritet të ndodhë tashmë që Villa zyrtarizoi transferimin e Ross Barkley, një tjetër mesfushor ofensiv.
