Mediat angleze kanë raportuar se Virgil van Dijk ka dëshirë të rinovojë kontratën e tij me Liverpool. Kjo është hera e parë që mbrojtësi ka shprehur dëshirën për të vijuar karrierën e tij në Anfield, pas lajmeve të vazhdueshme mbi largimin e mundshëm të tij në të ardhmen e afërt. Kontrata e kapitenit të “The Reds” skadon në fund të sezonit dhe hollandezi ka tërhequr vëmendjen e shumë klubeve rivale, mes tyre dhe klubet e Arabisë Saudite.
Pas largimit të Jurgen Klopp nga stoli i Liverpool, si dhe eleminimit të Hollandës nga Euro 2024, Van Dijk u shpreh se do të mendohej për hapin e rradhës në karrierën e tij. Kujtojmë se mbrojtësi mund të negociojë me klube të tjera duke filluar nga janari, dhe kjo ka shtuar presionin tek drejtuesit e Liverpool, të cilët nuk duan të humbasin hollandezin me kosto zero.
Gjithsesi, duket se situata ka marrë një rrjedhë pozitive, teksa Van Dijk ndihet mjaft mirë tek Liverpool nën drejtimin e trajnerit të ri Arne Slot. Një tjetër arsye se përse kapiteni i “The Reds” kërkon të qëndrojë në Anfield, është për të ruajtur formën e tij më të mirë drejt botërorit të vitit 2026. Shtatëlarti kërkon të udhëheqë Hollandën në botërorin që do të zhvillohet në Amerikë, dhe tek Liverpool mund të vazhdojë të luajë në nivelin më të lartë të mundshëm, për të qënë sa më i përgatitur më pas për kupën e botës.
Van Dijk u shpreh:
“Tek të dyja ekipet (Liverpool dhe Hollanda) jam i njejti Virgil van Dijk, lideri i madh. Dhe dua të mbetem i tillë edhe për 2 vitet e ardhshme. Jam human, edhe unë kam emocione. Pas një ndeshje si ajo ndaj Anglisë ku u eleminuam në minutën e fundit fillon të mendosh shumë gjëra…Është gjë e mirë që ditën tjetër shkova me pushime me fëmijët dhe familjen time, që është gjëja më e rëndësishme në jetë. Isha në gjendje të ndaja mendimet e mia dhe shumë shpejt u relaksova.”
