Mason Greenwood është duke tërhequr vëmendjen e shumë gjigandëve europianë, me paraqitjet e tij për Marseille në Ligue 1. Bayern Munich, Barcelona, si dhe Atletico Madrid janë duke monitoruar lojtarin, dhe nuk përjashtohet mundësia që një prej klubeve të bëjë një ofertë zyrtare për sulmuesin në të ardhmen.
Greenwood luajti sezonin e kaluar si i huazuar te Getafe në La Liga, ku arriti të shënojë 10 gola në 36 ndeshje. Këtë verë, anglezi kompletoi lëvizjen nga Manchester United tek Marseille në Francë, për 26.6 milionë paundë, dhe lojtari ka shënuar 5 gola në 4 ndeshjet e para me klubin e ri. Përpara transferimit në Francë, Atletico Madrid dhe Barcelona ishin në ndjekje të lojtarit, por eventualisht vendosën të hiqnin dorë.
Kjo dhe për shkak të problemeve të lojtarit jashtë fushës. Greenwood u arrestua në vitin 2022 për dhunë në familje dhe kërcënim, akuza që lojtari i hodhi poshtë si të pavërteta. Akuzat ndaj tij u hodhën poshtë dhe nga gjyata në vitin 2023, por gjithsesi, impakti i tyre tek karriera e lojtarit ishte i madh. Shumë zëra në Francë ishin kundër afrimit të tij tek Marseille, përfshirë këtu kryebashkiakun e qytetit, i cili i bëri thirrje klubit të mos blinte sulmuesin.
Gjithsesi, Mason Greenwood po përpiqet të japë më të mirën e tij në fushë në një përpjekje për t’u rikthyer në nivelet më të larta, si dhe për të rifituar disa prej fansave që mund t’i ketë humbur. Lojtari do të ketë një tjetër mundësi për të impresionuar ditën e diel, kur Marseille të përballet me Lyon. Ekipi i Greenwood ka ambicie të mëdha këtë sezon, dhe këtu nuk përjashtohet titulli kampion në Ligue 1.
Ndërkohë, mbetet të shohim nëse Bayern, Barcelona apo Atletico do të binden në një moment të dytë, për të bërë një ofertë zyrtare për Mason Greenwood.
