Manchester United dhe Chelsea janë dy ekipet që kryesojnë për momentin, garën për shërbimet e sulmuesit të Sporting Lisbon, Viktor Gyokeres. Ky është lajmi që kanë bërë të ditur së fundmi mediat angleze. Gyokeres është kthyer në një nga sulmuesit më të kërkuar në Europë për momentin, falë formës fantastike me Sporting. Suedezi ia doli të shënonte një tripletë në fitoren fantastike të ekipit të tij ndaj Manchester City me rezultatin 4-1.
Viktor Gyokeres ka shënuar deri më tani 66 gola në 67 ndeshje me Sporting, që kur iu bashkua klubit portugez në vitin 2023 nga Coventry City. Lojtari ka tashmë një vlerë prej 100 milionë eurosh për prishjen e kontratës, dhe duket se destinacioni i tij i rradhës do të jetë Premier League.
Gjithsesi, sulmuesi nuk pritet të largohet nga Sporting në janar, por vetëm në fund të sezonit. Manchester United para pak ditësh njoftoi afrimin e trajnerit të Sporting, Ruben Amorim, në krye të pankinës në Old Trafford. Vendosja e Amorim në krye të United i bën “Djajtë e Kuq” akoma më shumë favoritë për të siguruar kartonin e Gyokeres, duke marrë parasysh lidhjen e sulmuesit me trajnerin e tij tek Sporting.
Kujtojmë se United është një nga ekipet që ka shënuar më pak gola këtë sezon në Premier League, pavarësisht faktit se kanë në organikën e tyre jo pak lojtarë në repartin e sulmit. “Djajtë e Kuq” janë tashmë në kërkim të një lojtari të provuar, dhe Viktor Gyokeres duket alternativa perfekte.
Megjithatë, konkurrenca për kartonin e lojtarit mbetet e ashpër. Chelsea gjithashtu thuhet se po eksploron mundësinë e afrimit të sulmuesit, duke qënë se lojtarët aktualë në ekip ende nuk kanë arritur të bindin 100% drejtuesit e bluve të Londrës. Arsenal dhe Barcelona janë po ashtu ndër ekipet që po monitorojnë Viktor Gyokeres.
