Sipas prestigjozes franceze, L’Équipe, drejtuesit e Manchester United janë duke monitoruar sulmuesin e Paris Saint-Germain, Randal Kolo Muani. Sulmuesi francez duket se nuk ka më një të ardhme në klubin parizien, teksa trajneri Luis Enrique nuk e sheh më si pjesë të planeve të tij për të ardhmen. Kjo u bë e qartë dhe në ndeshjen e fundit të PSG ndaj Lyon, ku tekniku spanjoll nuk e përfshiu Kolo Muani në grupin e lojtarëve të disponueshëm për sfidën. Kjo erdhi pavarësisht faktit se lojtari është në formë të mirë fizike dhe i disponueshëm.
Gazetari sportiv, Fabrizio Romano, ka konfirmuar se lojtari do të ketë mundësinë të largohet nga Paris Saint-Germain që në merkaton e janarit, duke qënë se nuk bën më pjesë në planet e Luis Enrique. Manchester United ka shprehur prej kohësh interesin e vet për sulmuesin, por transferimi i tij në Old Trafford do të jetë i komplikuar. Kjo për shkak të problemeve të brendshme që drejtuesit e klubit kanë me njëri-tjetrin. Skenari që ka më shumë gjasa të ndodhë është afrimi i Kolo Muani në formë huazimi, me ose pa të drejtë blerjeje.
Në të njejtën kohë, një tjetër klub që ka shprehur interes për shërbimet e sulmuesit është dhe RB Leipzig në Gjermani. Klubi gjerman mund të hidhet në sulm për lojtarin, por zëra pranë tij bëjnë me dije se francezi do të preferonte një lëvizje drejt Premier League. Kjo pavarësisht faktit se Kolo Muani e njeh mjaft mirë kampionatin gjerman, duke qënë se është aktivizuar më parë me Frankfurt.
Ndërkohë tek PSG, Škriniar gjithashtu u la jashtë grumbullimit për ndeshjen ndaj Lyon. Edhe ky i fundit mund të largohet nga klubi që në merkaton e janarit, pasi nuk bën më pjesë në planet e trajnerit Luis Enrique.
