Drejtuesit e Manchester United janë duke eksploruar mundësinë e afrimit të një mbrojtësi të majtë, në këtë merkato janari. Financat e klubit anglez nuk janë optimale për të realizuar një lëvizje, por largimet e mundshme të Marcus Rashford dhe lojtarëve të tjerë mund t’i hapin dyert United për të sjellë lojtarë të rinj në Old Trafford. Por cilat janë alternativat që drejtuesit e klubit po monitorojnë përsa i përket repartit të mbrojtjes?
Mes emrave janë Patrick Dorgu i Lecce, Rayan Aït-Nouri i Wolves dhe Tyrick Mitchell i Crystal Palace. Drejtuesit e Manchester United gjithashtu kanë shprehur interes për Nuno Mendes, i cili momentalisht aktivizohet me PSG në Francë. Gjithsesi, ky i fundit nuk pritet të largohet nga parizienët këtë merkato janari pasi shihet si mjaft i rëndësishëm në Paris.
Pozicioni që ka më shumë nevojë për përforcime tek United është ai i krahut të majtë të mbrojtjes. Në këtë pozicion, opsionet e trajnerit Amorim janë Tyrell Malacia dhe Luke Shaw, por asnjëri prej tyre nuk ka mundur të performojë dot në mënyrë konsistente, për shkak të dëmtimeve. Malacia ka shpenzuar më shumë se 1 vit jashtë fushave të blerta për shkak të një dëmtimi në gju, ndërkohë që Shaw gjithashtu ka vuajtur nga disa dëmtime të njëpasnjëshme gjatë sezoneve të fundit.
United është ende në garë për të fituar një trofe në Europa League dhe FA Cup, dhe kjo do të thotë se trajneri Amorim ka nevojë për sa më shumë opsione në ekipin e tij. Në Premier League situata nuk është aq e mirë, teksa “Djajtë e Kuq” ndodhen në vendin e 13 në renditjen e përgjithshme. Disfata e fundit ndaj Brighton me shifrat 3-1 vuri edhe një herë tjetër në pah problemet serioze të United në repartin difensiv, por në të njejtën kohë, edhe pamundësinë e skuadrës për të prodhuar më shumë raste për shënim.
