Chelsea dhe Liverpool duket se do të përfshihen në një garë të ashpër, për të siguruar shërbimet e asit të Brighton, Alexis Mac Allister. Presidenti i Chelsea, Todd Boehly, po shqyrton një tjetër plan për të sjellë mesfushorin në Stamford Bridge, duke mposhtur konkurrencën nga ana e “The Reds”.
Boehly kërkon të realizojë një marrëveshje në formë shkënbimi, duke i ofruar Brighton për Alexis Mac Allister, përveç parave, dhe kartonin e Levi Colwill, i cili luan momentalisht tek Brighton si i huazuar nga Chelsea. Trajneri i “pulëbardhave”, De Zerbi, ka shprehur publikisht dëshirën e tij për të punuar të paktën dhe 1 vit tjetër me Levi Colwill në Amex. Italiani ka thënë:
“Nuk është e lehtë të gjesh një tjetër mbrojtës të majtë me kualitetin e tij…”
Megjithëse Levi Colwill vlerësohet shumë lart dhe në Stamford Bridge, drejtuesit e Chelsea janë të gatshëm të heqin përfundimisht dorë prej tij, nëse kjo do të thotë se mund të sjellin në Londër mesfushorin argjentinas. Sidomos duke marrë parasysh se reparti i mbrojtjes tek blutë është deri diku i kompletuar, me emra si Wesley Fofana, Kalidou Koulibaly, Benoit Badiashile dhe Cucurella. Për më shumë, dy klubet thuhet se kanë një marrëdhënie të mirë në nivelin e drejtuesëve sportive, gjë që mund ta bëjë më të lehtë realizimin e lëvizjes.
Mac Allister ndërkohë ka një kontratë aktive me Brighton deri në vitin 2025, dhe përflitet prej kohësh se do të largohet në verë nga klubi. Kjo ide është konfirmuar nga vet babai i futbollistit, i cili u shpreh për prestigjozen Puroboca:
“Normalisht merkaton e ardhshme ai (Mac Allister) do të luajë për një klub tjetër, por nuk e dimë për cilin. Bisedimet kanë nisur në përgjithësi, dhe ka shumë gjasa që Alexis do të luajë në një skuadër tjetër duke nisur nga korriku.”
