Drejtuesit e Arsenal janë duke menduar mundësinë e transferimit të talentit të West Ham, Mohammed Kudus, në Emirates gjatë merkatos së janarit. Klubi është prej kohësh i interesuar tek Kudus, që para se ky i fundit t’i bashkohej West Ham nga Ajax vitin e kaluar, për shifrën e 40 milionë paundëve. Tashmë, vlera për kartonin e lojtarit është shumë më e lartë, dhe drejtuesit e Arsenal mund të jenë të detyruar të paguajnë rreth 90 milionë paundë për të siguruar shërbimet e anësorit.
Përveç nevojës për përforcime, afrimi i Kudus mund të rezultojë mjaft i rëndësishëm për Arsenal, duke marrë parasysh largimin e mundshëm të Leandro Trossard. Sipas raportimeve të fundit të mediave angleze, arabët e Al-Ittihad janë duke përgatitur një ofertë prej 40 milionë paundësh për shërbimet e belgut të Arsenal. Verën e kaluar klubi arab kërkoi të huazonte lojtarin e talentuar të Arsenal, por nuk ia doli të sigurojë një marrëveshje.
Kudus nga ana tjetër po kalon një moment delikat tek West Ham. Lojtari u nxorr me karton të kuq jashtë fushe, në ndeshjen përballë Tottenham para 2 javësh, ku ekipi u mposht me rezultatin 4-1. Federata angleze e futbollit e dënoi lojtarin duke e përjashtuar atë për 3 ndeshje, por ky dënim mund të zgjatet. Por pavarësisht këtij incidenti, duhet theksuar se ganezi është paraqitur në mënyrë fantastike që prej transferimit të tij tek West Ham. Lojtari ka shënuar 16 gola, si dhe 7 asiste në 55 paraqitje gjithsej me klubin londinez.
Kudus ka rreth 4 vite të mbetura në kontratën e tij aktive me West Ham, dhe kjo e komplikon pak situatën në lidhje me këdo ekip që kërkon të sigurojë firmën e tij. Trossard ndërkohë ka vetëm 1 vit e gjysmë në kontratën e tij me Arsenal, dhe londinezët duhet të shpejtojnë për t’i paraprirë gjysmës së dytë të sezonit, që do të jetë mjaft impenjative për ekipin e Mikel Arteta.
