Kapiteni i Arsenal, Martin Odegaard, pritet të jetë jashtë fushave të blerta për të paktën 3 javë, pas dëmtimit të marrë në sfidën ndaj Austrisë. Mjekët e kombëtares norvegjeze bënë të ditur se lojtari ka marrë një dëmtim në kyçin e tij të majtë, dhe periudha e rikuperimit mund të jetë edhe më e gjatë se 3 javë. Mesfushori është rikthyer në Londër për t’iu nënshtruar ekzaminimeve të tjera. Trajneri Mikel Arteta pritet të japë më shumë detaje në lidhje me dëmtimin e Odegaard, në prag të sfidës përballë Tottenham.
Ola Sande, pjesë e stafit mjekësor në kombëtaren norvegjeze u shpreh:
“Ajo që dimë deri tani nga rezultatet e skanerit në Londër është fakti se në kyçin e majtë nuk ka fraktura. Tek Arsenal janë të bindur se nuk ka thyerje, por kjo përsëri mund të marrë kohën e vet për t’u rikuperuar. Në rastin e një frakture, kemi të bëjmë me 6 ose më shumë javë jashtë fushave.”
Nëse mesfushori i talentuar i Arsenal mungon vetëm 3 javë, ai do të humbasë 5 takime me Arsenal, duke përfshirë këtu një përballje mjaft të rëndësishme ndaj Manchester City në Premier League. Klubi londinez do të luajë përballë Tottenham ditën e diel pa Odegard, Rice që është i pezulluar, si dhe pa Merino, që gjithashtu është i dëmtuar. Mesfusha e “topçinjëve” ka marrë një goditje të rëndë në këtë fillim sezoni, dhe priet të shohim sesi trajneri Mikel Arteta do të menaxhojë situatën.
Mbrojtësi italian, Riccardo Calafiori gjithashtu është në dyshim për t’u aktivizuar në sfidën ndaj Tottenham. Lojtari mori një dëmtim në sfidën ndaj Francës, por për fat të mirë jo dhe aq serioz. Gjithsesi, Arteta mund të vendosë që t’i japë më shumë kohë Calafiori për t’u rikuperuar si duhet.
