Ylli i Newcastle, Alexander Isak, ka tërhequr vëmendjen e drejtuesëve të Barcelona. Klubi katalanas pritet të bëjë një ofertë për sulmuesin gjatë merkatos së verës, dhe thuhet se spanjollët e shohin suedezin si zëvëndësuesin afatgjatë të Robert Lewandowski. Drejtuesit e klubit e dinë se Alexander Isak ka kualitetin e duhur për t’u kthyer në pikën e referimit për skuadrën, në repartin ofensiv.
Problemi kryesor për realizimin e këtij transferimi është kostoja për kartonin e lojtarit. Newcastle e vlerëson kartonin e Isak në vlerën e 100 milionë paundëve, një shifër mjaft e lartë për çdo ekip. Sidomos për Barcelona, duke marrë parasysh problemet financiare të klubit spanjoll. Disa burime pranë klubit bëjnë me dije se katalanasit mund të bëjnë një ofertë në formë të kombinuar, pra para, dhe në të njejtën kohë një prej lojtarëve të tyre, për të siguruar Isak.
Megjithatë, Newcastle mbetet skeptik për të lënë të lirë një nga lojtarët e vet më të mirë dhe më të rëndësishëm. Sulmuesi suedez ka tërhequr vëmendjen dhe të klubeve rivale në Premier League si Chelsea dhe Arsenal. Këta të fundit thuhet se janë gati të thyejnë rekordin e tyre për transferimin më të shtrenjtë, për të sjellë Alexander Isak në Emirates. Në rast se suedezi vendos të largohet nga Newcastle, drejtuesit e klubit do të preferonin që lojtari të transferohej diku jashtë Anglisë, dhe jo tek një nga klubet rivale në Premier League. Ky aspekt favorizon Barcelona në garën për shërbimet e sulmuesit të talentuar.
Isak ka një kontratë aktive me klubin e tij deri në vitin 2028, dhe për momentin mbetet një pjesë e rëndësishme e projektit të trajnerit Eddie Howe. Burime pranë klubit bëjnë me dije se Howe është i qetë dhe ka besim se klubi nuk do të shesë një nga lojtarët më të rëndësishëm për të, por kjo mbetet për t’u parë.
