Drejtuesit e Barcelona janë duke monitoruar sulmuesin e talentuar të Milan, Rafael Leao. Portugezi po kalon një moment të vështirë këtë sezon dhe duket se e ka humbur rolin e titullarit, për shkak të marrëdhënies së tij të vështirë me trajnerin Paulo Fonseca. Duket se sulmuesi nuk po e gjen dot gjuhën e përbashkët me trajnerin. Në këtë situatë, vlera e kartonit të Leao është në rënie dhe Barcelona kërkon të përfitojë nga situata. Presidenti Joan Laporta dhe bordi drejtues kanë patur në shënjestrën e tyre lojtarin edhe më parë, kur transferimi i Nico Williams nga Athletic Bilbao dështoi.
Leao ka një kontratë të vlefshme me klubin deri në vitin 2028, pas rinovimit që firmosi verën e vitit të kaluar. Gjithashtu, lojtari nuk ka një klauzolë për prishjen e marrëveshjes me Milan në kontratën e tij. Kjo do ta bëjë më të vështirë për Barcelona, apo çdo klub tjetër që kërkon të sigurojë shërbimet e portugezit. Ndërkohë, trajneri i Milan, Paulo Fonseca, ka qartësuar situatën në lidhje me Leao, duke përjashtuar problemet personale, dhe duke vendosur theksin tek performance e sulmuesit:
“Nuk ka asnjë konflikt mes meje dhe Leao. Unë vendos si trajner dhe të gjithë lojtarët duhet të japin më të mirën. Nuk duhet t’i lutem askujt për të dhënë maksimumin e tij. Leao hyri në fushë me sjelljen e duhur ndaj Napoli dhe nuk kam më asgjë për të thënë.”
Kujtojmë se Leao e nisi sfidën ndaj Napoli nga stoli dhe duket se e njejta situatë do të vazhdojë. Trajneri i Barcelona Hansi Flick, si dhe drejtori sportiv i klubit Deco, e shohin lojtarin si mjaft të rëndësishëm në planet e të ardhmes për sulmin. Super agjenti Jorge Mendes, megjithëse nuk përfaqëson në mënyrë direkte lojtarin thuhet se ka një influencë të madhe tek ai. Mendes po përpiqet tashmë prej kohësh të afrojë Leao tek Barcelona. Mbetet të shohim nëse transferimi do të bëhet realitet.
