Trajneri i ri i Bayern Munich, Vincent Kompany, është në kërkim të një mbrojtësi dhe duket se tekniku belg e ka përcaktuar lojtarin e tij të preferuar. Kompany kërkon të sjellë në Allianz Arena, asin e prapavijës së Liverpool, Joe Gomez. Ky i fundit kaloi një nga sezonet e tij më të mira me Liverpool, sezonin që lamë pas, duke u aktivizuar në 51 paraqitje. Performancat mjaft të mira me “The Reds” bënë që mbrojtësi të rikthehet në kombëtaren angleze, duke fituar kështu besimin e trajnerit Southgate.
Kompany vlerëson aftësinë e Gomez për t’u aktivizuar në pozicione të ndryshme në fushë, gjë që lojtari e dëshmoi më së miri këtë sezon, duke u aktivizuar në qendër të mbrojtjes, në krah, dhe madje disa herë dhe në mesfushë. Megjithatë, Kompany nuk do ta ketë të lehtë të sjellë lojtarin në Allianz Arena. Liverpool nuk do që të heqë dorë nga një prej lojtarëve më të mirë. Për më shumë, situata e lojtarit në lidhje me kontratën e tij me klubin është gjithashtu jo idealja për Bayern. Gomez firmosi një rinovim kontrate në vitin 2022 dhe sipas saj pritet të jetë në Anfield deri në vitin 2027.
Pikërisht për këtë arsye, Bayern është duke monitoruar dhe lojtarë të tjerë në repartin e mbrojtjes. Një prej tyre është dhe Levi Colwill i Chelsea. Talenti anglez ka një kontratë aktive me blutë e Londrës deri në vitin 2029, dhe për momentin dëshiron të qëndrojë në Stamford Bridge. Megjithatë, Bayern Munich është një mundësi që vështirë se refuzohet. Një tjetër emër që drejtuesit e klubit gjerman po monitorojnë është dhe Jonathan Tah i Bayer Leverkusen. Tah ka impresionuar me paraqitjet e tij, sezonin që lamë pas, duke fituar titullin kampion në Bundesliga si dhe kupën e Gjermanisë. Mbrojtësi mund të ketë tashmë mundësinë për të luajtur me ekipin më të madh në Gjermani.
