Drejtuesit e Manchester City janë gjithnjë e më shumë të bindur, se Erling Haaland do të firmosë eventualisht një kontratë të re me “qytetarët”. Bisedimet janë duke u zhvilluar mes klubit dhe sulmuesit, dhe sipas mediave angleze, lojtari mund të firmosë një rinovim që do ta bënte atë futbollistin më të paguar në Premier League. Sipas kontratës së re, Haaland pritet të përfitojë rreth 500 mijë paundë në javë, një shifër marramendëse, duke tejkaluar kështu edhe pagën e Kevin De Bruyne.
Drejtuesit e City duket se kanë marrë një përgjigje pozitive nga përfaqësuesit e lojtarit, dhe rinovimi pritet të jetë i vlefshëm për 2 vite. Ish-sulmuesi i Borussia Dortmund momentalisht paguhet rreth 375 mijë paundë në javë në Etihad. Nëse Haaland vendos përfundimisht të pranojë rinovimin, ai do të jetë pjesë e “qytetarëve” deri në sezonin 2028-29.
Megjithatë, drejtuesit e Manchester City duan që në kontratën e re, të mos ekzistojë më klauzola për prishjen e saj, e cila është momentalisht e parashikuar në kontratën aktuale mes lojtarit dhe klubit. Haaland ka një kaluzolë për prishjen e kontratës në vlerën e 150 milionë paundëve dhe drejtuesit e City duan që ta heqin prej kontratës së re. Ndërkohë, përfaqësuesit e Haaland janë duke insistuar që kaluzola të vazhdojë dhe të jetë pjesë e kontratës. Mbetet të shohim nëse palët do të gjejnë apo jo akordin.
Bomberi i Manchester City ka shënuar plot 105 gola në 113 paraqitje me klubin e tij. Haaland gjithashtu fitoi tripletën me City në sezonin e tij të parë, si dhe ka fituar 2 herë rresht titullin kampion në Premier League. Pavarësisht se City po kalon një periudhë delikate në këto momente, pas 4 humbjeve rresht, duket se sulmuesi është i lumtur dhe dëshiron që të qëndrojë në Etihad.
