Portieri i Liverpool, Alisson Becker, ka shprehur shqetësimin e tij për kalendarin gjithnjë e më të ngjeshur fubollistik. Braziliani është ankuar për faktin se askush nuk merr mendimin e lojtarëve, përpara propozimeve që çojnë në më shumë ndeshje, si rasti i formatit të ri të UEFA Champions League. Sezonin e kaluar Liverpool zhvilloi plot 58 ndeshje. Këtë sezon, nëse “The Reds” i shkojnë deri në fund çdo kompeticioni, do të luajnë plot 65 ndeshje.
Alisson Becker ka komentuar:
“Disa herë askush nuk pyet lojtarët se çfarë ata mendojnë për shtimin e më shumë ndeshjeve. Mbase opinioni jonë nuk ka vlerë, por të gjithë e dinë se çfarë mendojmë për më shumë ndeshje. Të gjithë janë të lodhur nga kjo.”
Braziliani shtoi:
“Nuk jemi budallenj, e kuptojmë se njerëzit duan më shumë ndeshje. Por gjëja më e përgjegjshme për t’u bërë është që të gjitha palët përgjegjëse për kalendarin, të ulen së bashku dhe të dëgjojnë të gjithë zërat, përfshirë këtu dhe lojtarët… Nëse je i lodhur nuk mund të garosh në nivelin më të lartë. Ajo që unë dua të bëj është të jap më të mirën time në të gjitha ndeshjet që luaj. Për momentin, duket se nuk jemi afër një zgjidhjeje për të mirën e futbollit dhe të lojtarëve.”
Mbrojtësi zvicerian i Manchester City, Manuel Akanji, gjithashtu ironizoi me humor duke thënë se mund të heqë dorë nga futbolli i luajtur kur të mbushë 30 vjeç, për shkak të kalendarit të ngarkuar. Ndërkohë, trajneri i Liverpool, Arne Slot, ka thënë se mund të gjykojë formatin e ri të UEFA Champions League vetëm në fund të sezonit. Tekniku hollandez gjithashtu tha se për momentin, askush nuk e ka zgjidhjen për problemin e kalendarit të ngarkuar.
