Kapiteni i kombëtares angleze, Harry Kane, ka thënë se ndihet gati për një kapitull të ri të Anglisë. Në një konferencë për shtyp, bomberi anglez tha se ende e ndien dhimbjen e disfatës ndaj Spanjës në finalen e Euro 2024, por është më i motivuar se kurrë për të ndihmuar ekipin e tij, të fitojë një trofe. Sulmuesi i Bayern Munich u shpreh:
“Kur i afrohesh aq pranë një trofeu, dhe nuk ia del dot ta fitosh është e vështirë. Por më motivon akoma më shumë. Duhet të përpiqemi që të kapim atë nivel. Detyra jonë është të përmirësohemi. Mendoj se kur shikon lojtarë si Ronaldo, Modric, Messi dhe lojtarët e tjerë që po luajnë në të 30-at, ky është inspirimi për mua pasi tregon se mund të luash në një nivel të lartë për një kohë të gjatë.”
Kane shtoi:
“Dua të luaj futboll sa më gjatë të kem mundësi dhe në nivelin më të lartë, përsa kohë është e mundur. Unë i shoh ata lojtarë si motivim dhe inspirim për ta bërë këtë gjë. Mendoj se jam në një gjendje të mirë fizike dhe mendore, për të patur një tjetër sezon të mirë. Shpresoj që kjo të vazhdojë dhe në vitet e ardhshme.”
Kujtojmë se tek kombëtarja angleze, në krye të pankinës ndodhet trajneri i përkohshëm Carsley. Ky i fundit mori drejtimin pas dorëheqjes së Gareth Southgate. Federata angleze e futbollit i ka dhënë Carsley drejtimin e ekipit për 2 ndeshjet e rradhës, por nuk përjashtohet mundësia që tekniku të qëndrojë më gjatë në krye të pankinës së “3 luanëve”.
Federata angleze e futbollit ka pritshmëri mjaft të larta për kompeticionin madhor të rradhës, që është botërori i vitit 2026. Anglia mbetet një nga ekipet favorite për të triumfuar në turneun madhështor, pavarësisht dështimeve në kompeticionet e mëparshme.
