Mesfushori i talentuar i Bayer Leverkusen, Florian Wirtz, është kthyer në një nga lojtarët më të kërkuar nga klubet e mëdha europiane. Sipas presigjozes gjermane Bild, lojtari është nën shënjestrën e Bayern Munich, Real Madrid, Manchester City dhe Arsenal. Të gjitha klubet e përmendura kanë një shanc real për të firmosur me Wirtz në merkaton e ardhshme të verës. Por cili ekip është momentalisht më afër firmës së Wirtz?
Drejtuesit e Bayern Munich e kanë bërë të qartë prej kohësh interesimin e tyre për gjermanin, madje dhe publikisht. Bavarezët pritet të bëjnë një ofertë zyrtare për mesfushorin, por çmimi për kartonin e tij mbetet një problem për të gjitha ekipet e interesuara. Leverkusen kërkon të paktën 150 milionë euro për lojtarin, shifër kjo e lartë edhe për një ekip si Bayern.
Konkurrenca ndërkohë është e madhe për lojtarin, teksa Manchester City, Arsenal dhe Real Madrid janë gjithashtu në garë. City mund të hidhet në sulm për Wirtz pasi lojtari shihet si zëvëndësuesi perfekt për Kevin de Bruyne, i cili është drejt fundit të karrierës së tij me Manchester City. Real Madrid gjithashtu e sheh Wirtz si një zëvëndësues të denjë të Luka Modric. Shancet që gjermani t’i bashkohet madrilenëve do të ishin edhe më të mëdha, nëse Xabi Alonso do të merrte drejtimin e pankinës së Real, eventualisht në të ardhmen, siç është përfolur nga disa media europiane.
Barcelona ndërkohë gjithashtu ka shprehur interes për Florian Wirtz, por katalanasit mund të konsiderohen jashtë garës, për shkak të problemeve të tyre financiare. Përsa i përket vet lojtarit, nëse ai zgjedh të largohet do të ishte për një klub ku mund të fitojë UEFA Champions League. Gjithsesi, lojtari ende nuk ka bërë publike asnjë dëshirë për t’iu bashkuar një tjetër klubi europian.
