Ilkay Gündogan kërkon t’i japë fund karrierës së tij tek Barcelona. Ky është lajmi më i fundit i publikuar nga mediat spanjolle dhe duket se ish-mesfushori i Manchester City mund të largohet nga Camp Nou brenda kësaj merkatoje. Prej kohësh tashmë kanë qarkulluar lajme se Gündogan nuk është i lumtur tek Barcelona, dhe ndihet i zhgënjyer me trajtimin e tij personal, si dhe me prespektivën e klubit për të ardhmen.
Pavarësisht se gjermani ishte një nga lojtarët më të dalluar tek Barcelona sezonin që lamë pas, klubi katalanas nuk e ka shprehur faktin se nëse oferta e duhur financiare troket në derë, nuk do të ngurrojë për të shitur Gündogan. Ky i fundit nuk udhëtoi me ekipin në transfertën ndaj Valencia, që Barcelona e fitoi me rezultatin 2-1. Klubi e justifikoi mungesën e Gündogan me një problem fizik. Megjithatë, është tashmë e qartë se tensionet mes lojtarit dhe Barcelona janë rritur.
Sipas prestigjozes Sport, vet lojtari ka kërkuar nga bordi largimin dhe trajneri Hansi Flick është njohur gjithashtu me kërkesën e tij. Në Europë, por jo vetëm, është një numër i madh klubesh që janë duke monitoruar situatën e lojtarit me origjinë turke. Në Turqi, presidenti i Galatasaray ka shprehur disa herë dëshirën e tij personale, për të sjellë Gündogan në ekip. Fenerbahce gjithashtu ka komunikuar se nëse operacioni mund të realizohet, do të hidhet në sulm për mesfushorin.
Nga ana tjetër, ofertat nuk kanë munguar as nga Arabia Saudite, teksa që sezonin e kaluar, shumë klube arabe kanë shprehur interesin e tyre për Gündogan. Për momentin ende nuk dihet se cili do të jetë qëndrimi që Barcelona do të mbajë lidhur me gjermanin. Gündogan është një nga lojtarët kyç në Camp Nou, por me ardhjen e Dani Olmo këtë verë, ish-mesfushori i City nuk mund të konsiderohet i pazëvëndësueshëm.
