Megjithës Lautaro Martinez ka një kontratë aktive deri në vitin 2026 me Inter, klubi italian është duke marrë parasysh skenarin e largimit të lojtarit nga zikaltërit. Sidomos kur një nga klubet që interesohet për shërbimet e tij është Manchester City.
Sipas Tuttosport, Inter është i ndërgjegjshëm për interesimin e ekipit të Pep Guardiolës, dhe po punon për të gjetur zëvëndësuesin potencial të Martinez, nëse ai vendos të largohet. Drejtuesit italianë kanë identifikuar që tani një sulmues mjaft të talentuar. Bëhet fjalë për asin e Borussia Mönchengladbach, Marcus Thuram.
Por aspekti financiar i operacionit mund të jetë një problem për Inter. Momentalisht, raportimet bëjnë me dije se italianët nuk janë të gatshëm të paguajnë 37.7 milionë eurot e kërkuara nga gjermanët për kartonin e tij. Ekipi i Simeone Inzaghit mendohet se ishte shumë pranë marrëveshjes me Thuram verën e kaluar, për shifrën e 16.5 milionë paundëve, së bashku me 4.4 milionë të tjera në formë bonusi. Por shumë pak përpara arritjes së akordit sulmuesi pësoi një dëmtim në gju, gjë që anulloi transferimin.
Mësohet se dëmtimi i Thuram është ende një shqetësim për Inter, që kërkon të sjellë në San Siro një lojtar të cilit mund t’i besohet sulmi në planin afatgjatë. Ndërkohë përsa i përket Lautaro Martinez, përveç Manchester City, Liverpool dhe Atletico Madrid gjithashtu interesohen për shërbimet e argjentinasit.
Mediat në Itali kanë bërë të ditur se ekipi madrilen ka dërguar përfaqësuesit e vet për të parë Martinez në aksion, gjatë derbit me Milan në San Siro. Për fat të keq, Lautaro nuk arriti të ketë impaktin e duhur për të tijët në këtë sfidë, dhe u zëvëndësua në fund të pjesës së parë. Gjithsesi, talenti i tij mbetet i padiskutueshëm dhe cilido ekip që dëshiron shërbimet e tij duhet të garojë me klube rivale.
