Al-Ittihad ende nuk ka hequr dorë nga Mohamed Salah. Klubi arab do të vijë me një tjetër ofertë për sulmuesin e Liverpool, duke qënë se merkatoja në Arabinë Saudite mbyllet në 7 shtator. Pas refuzimit të ofertës prej 150 milionë paundë nga “The Reds”, klubi arab pritet të bëjë një tjetër ofertë stratosferike. Al-Ittihad po bën gati 200 milionë paundë për t’i ndryshuar mendjen Liverpool.
Anglezët kanë përsëritur qëndrimin e tyre, duke thënë se Salah nuk është në shitje, por deri në mbyllje të merkatos nuk përjashtohen surprizat. Salah shënoi 30 gola në të gjitha kompeticionet për Liverpool sezonin e kaluar, pavarësisht se klubi nuk ia doli dot të fitonte një trofe madhor. Verën e kaluar Salah firmosi një kontratë të re, dhe për 3 vite të tjera me “The Reds”.
Ndërkohë, trajneri Klopp ka shprehur disa herë shqetësimin e tij për ofertat që vijnë nga Arabia Saudite, duke nënvizuar dhe faktin se merkatoja në Arabinë Saudite qëndron e hapur më gjatë sesa ajo në Europë. Sipas Klopp, kjo i lejon klubet arabe të shpërqëndrojnë lojtarët me ofertat e tyre. Gjithsesi, tekniku gjerman gjithashtu ka shprehur dhe një herë tjetër bindjen e tij se Salah nuk do të largohet nga Anfield, të paktën brenda këtij sezoni.
Një tjetër arsye se përse Liverpool nuk do të heqë dorë prej Salah, përtej rëndësisë së lojtarit, është dhe vështirësia në gjetjen e një zëvëndësuesi. Pavarësisht rrjetit të gjerë të agjentëve që klubi anglez ka në dispozicion, një lojtar në nivelin e Salah është gati e pamundur të gjendet në këtë moment, duke marrë parasysh se merkatoja në Europë është tashmë e mbyllur. Për më shumë, Salah ka dhe 2 vite të mbetura në kontratën e tij me “The Reds”. Kjo do të thotë që klubi ka ende kohë për të përfituar nga shitja e kartonit të sulmuesit.
