Drejtuesit e Milan në Itali janë duke punuar për të finalizuar transferimin e Kyle Walker, nga Manchester City në San Siro tek gjigandët italianë. Trajneri Pep Guardiola bëri të ditur para disa ditësh se mbrojtësi ka kërkuar të largohet nga klubi, dhe tani, Walker duket shumë afër Milan. Anglezi pritet të firmosë një kontratë për 2 vite e gjysmë me kuqezinjtë, dhe kjo do të jetë hera e parë që Walker do të luajë në Serie A.
Sipas mediave angleze, Zlatan Ibrahimovic, i cili është tani një këshilltar pranë bordit të Milan, është një nga figurat kyçe që po punon në prapaskenë për të finalizuar lëvizjen. Përpara disa muajsh, Walker u linkua me një transferim drejt Arabisë Saudite, por burime pranë lojtarit bëjnë me dije se ai ka ende dëshirë të luajë në Europë. Milan duket se është i vetmi klub për momentin që po shtyn për të firmosur me lojtarin, dhe kjo pritet të shpejtojë finalizimin e transferimit. Mbrojtësi nuk e ka të garantuar vendin e titullarit tek Milan, por pritet të luftojë për të qënë zgjedhja e parë e teknikut Sérgio Conceição.
Kujtojmë se Walker ka ende një sezon të vlefshëm në kontratën e tij aktuale me Manchester City. Kjo do të thotë se Milan do të duhet t’i paguajë klubit anglez një shifër për transferimin e lojtarit, pavarësisht moshës së tij, apo faktit se lëvizja do të kryhet në merkaton e janarit.
Walker u bë pjesë e Manchester City në vitin 2017 nga Tottenham Hotspur. Anglezi ka fituar deri më tani 6 herë titullin kampion në Premier League, si dhe UEFA Champions League, përveç trofeve të tjerë. Trajneri Pep Guardiola ka nënvizuar disa herë rëndësinë e Walker në ekip, duke thënë se do të ishte e pamundur që City të fitonte trofetë pa të në ekip.
