Mediat angleze kanë raportuar se trajneri i Manchester City, Pep Guardiola, ka vendosur të rinovojë kontratën e tij me klubin anglez, deri në verën e vitit 2026. Ky ishte lajmi që të gjithë fansat e “qytetarëve” prisnin, dhe duket se Guardiola ka ende dëshirë të fitojë trofe në Etihad. Kujtojmë se tekniku spanjoll iu bashkua City në vitin 2016, dhe ka fituar plot 18 trofe deri më tani me klubin, duke përfshirë këtu 6 tituj kampion në Premier League, 2 FA Cup si dhe UEFA Champions League.
Vendimi për rinovimin e kontratës vjen në një periudhë delikate për klubin, si brenda fushave, ashtu dhe jashtë saj. City është mposhtur në 4 ndeshjet e fundit, ku disfata me e fundit ishte ajo ndaj Brighton në kampionat. Në të njejtën kohë, e ardhmja e disa lojtarëve veteranë, mjaft të rëndësishëm në klub si Kevin de Bruyne, është e paqartë. Manchester City gjithashtu do të përballet në gjykatë, me 115 akuzat e Premier League për shkeljen potenciale të rregullave të fair play-it financiar.
Një tjetër problem mjaft i madh për Manchester City në këtë moment janë dëmtimet. Kyle Walker, Nathan Ake, Manuel Akanji, Ruben Dias dhe John Stones janë të padisponueshëm për trajnerin Guardiola, ndërkohë që Foden dhe Gundogan ende nuk kanë gjetur formën e tyre më të mirë këtë sezon. Rodri ndërkohë do të jetë jashtë deri në fund të sezonit, dhe Guardiola do të duhet të vendosë tashmë nëse klubi do të sjellë një zëvëndësues apo jo për spanjollin, në merkaton e janarit.
Pas disfatës 4-1 ndaj Sporting në Champions League, tekniku i City u shpreh i motivuar për sfidat e reja që “qytetarët” kanë përpara. Duket se Guardiola është ende i uritur për të fituar trofe të tjera në Etihad dhe nuk ka ndërrmend të ndalet.
