Drejtori sportiv i Manchester United, Dan Ashworth, është larguar nga klubi pas vetëm 5 muajsh në Old Trafford. Ashworth mori rolin e drejtorit sportiv tek “Djajtë e Kuq” në korrik, pasi la klubin e tij të vjetër Newcastle. Vendimi për largimin e tij nga United u mor në një mbledhje të brendshme të klubit, pas disfatës 3-2 ndaj Nottingham Forest në shtëpi.
Manchester United ka nxjerrë një deklaratë zyrtare, ku bën me dije se vendimi për largimin e Ashworth u mor në dakordësi mes të dyja palëve. “Djajtë e Kuq” po kalojnë një tjetër sezon zhgënjyes dhe vendosën të shkarkojnë trajnerin Erik ten Hag, pas startit negativ të sezonit. Ekipi arriti të sigurojë vetëm 3 fitore në 9 takimet e para në Premier League. Trajneri i ri i skuadrës, Ruben Amorim, e nisi në mënyrë pozitive aventurën e tij në Old Trafford. Megjithatë, United ka pësuar disfatë në 2 ndeshjet e fundit, përballë Arsenal dhe Nottingham Forest.
Drejtuesit e klubit konfirmuan se shkarkimi i trajnerit Ten Hag dhe stafit të tij i ka kushtuar “Djajëve të Kuq” 10.4 milionë paundë. Në të njejtën kohë, afrimi i Amorim nga Sporting Lisbon i kushtoi klubit 11 milionë paundë. Por cila ishte arsyeja kryesore e largimit të drejtorit sportiv, Dan Ashworth? Sipas burimeve pranë klubit, arsyeja primare ishte kontrata e re që klubi i ofroi trajnerit Ten Hag, vetëm disa muaj para shkarkimit të tij. Ky vendim ka sjellë një dëm të madh financiar për United, tashmë që klubi prishin kontratën me teknikun hollandez në mënyrë të njëanshme.
Së fundmi, Manchester United ka njoftuar një rritje në çmimin e biletave për tifozët në Old Trafford. Kjo rritje është pritur me protesta nga ana e fansave, por Sir Jim Ratcliffe e ka justifikuar këtë lëvizje, me nevojën për të gjeneruar më shumë fonde për ekipin e parë.
