Manchester United do të hidhet zyrtarisht në sulm për talentin e Atalantës, Rasmus Hojlund. Sulmuesi është prej kohësh nën shënjestrën e klubit anglez, por deri më tani, “Djajtë e Kuq” ende nuk kishin bërë një ofertë financiare zyrtare. Sipas mediave angleze, drejtuesit e klubit janë tashmë të gatshëm të hedhin këtë hap, dhe do t’i ofrojnë Atalantës 50 milionë paundë për kartonin e danezit.
20 vjeçari ra në sy me paraqitjet e tij sezonin e kaluar, ku arriti të shënojë 9 gola me Atalantën. Megjithatë, operacioni për transferimin e tij në Old Trafford mund të rezultojë i komplikuar. Kjo pasi United ka paguar tashmë 60 milionë paundë për shërbimet e Mason Mount nga Chelsea, dhe situata financiare e klubit nuk premton për blerje të mëdha.
“Djajtë e Kuq” regjistruan humbje prej 115.5 milionë paundësh në vitin e fundit financiar dhe bordi drejtues i ka vendosur limite trajnerit Ten Hag mbi kërkesat në këtë merkato vere. Presioni për të shitur lojtarë është gjithashtu i madh. Mes emrave që mund të largohen nga Old Trafford janë: Harry Maguire, Jadon Sancho, Fred, Scott McTominay, Antony Martial, Alex Telles, Anthony Elanga, Eric Bailly por dhe të tjerë.
Pikëpyetjet janë akoma më të mëdha për United duke parë situatën e paqartë në lidhje me të ardhmen e klubit përsa i përket pronësisë së tij. Familja Glazer e cila zotëron aksionet e Manchester United, mendon prej kohësh të shesë klubin, por nuk ka marrë ende një vendim përfundimtar mes alternativave që i janë ofruar. Mes tyre, ajo më interesantja është e sheikut Jassim të Katarit. Në rastin se ky i fundit merr drejtimin e presidencës, trajneri Ten Hag pritet të ketë më shumë fonde në dispozicion për merkaton e verës, por dhe ato të ardhshme. Kjo do të thotë se United do të ketë mundësi të bëjë një tjetër ofertë dhe për Harry Kane, i cili është prej kohësh nën shënjestrën e “Djajëve të Kuq”, por vlera e kartonit të tij ka qënë problemi deri në këtë moment.
