Jadon Sancho është gati të rikthehet në Old Trafford, por vetëm nëse Erik ten Hag largohet nga posti i trajnerit. Sancho pati një periudhë mjaft të suksesshme tek Borussia Dortmund, në pjesën e dytë të sezonit që lamë pas. Klubi gjerman kërkon që të firmosë një kontratë të përhershme me anglezin, por kjo nuk do të jetë aspak e lehtë.
Pengesa e parë është kostoja për shërbimet e sulmuesit. Kartoni i Sancho pritet t’i kushtojë Dortmund, apo kujtdo klubi që dëshiron shërbimet e lojtarit, të paktën 50 milionë paundë. Pengesa tjetër në rrugën e Dortmund për të siguruar Sancho është vet dëshira e lojtarit. Anglezi kërkon të ringjallë karrierën e tij në Old Trafford, pavarësisht faktit se nën drejtimin e trajnerit aktual, nuk e ka këtë mundësi.
24 vjeçari pati një debat me Erik ten Hag mbi një postim në rrjetet e tij sociale ku u tregua kritik ndaj vendimeve të trajnerit. Sancho nuk pranoi të kërkojë falje apo të fshijë postimin dhe kjo solli në largimin e tij nga Old Trafford në formë huazimi tek Dortmund. Tekniku hollandez u shpreh i kënaqur me paraqitjet e mira të Sancho tek Borussia, duke u shprehur se këto paraqitje do të mbajnë në nivele të larta vlerën e kartonit të tij. Ky koment ishte një tjetër prove se Ten Hag nuk do të hedhë hapa pas në lidhje me fatin e Sancho, përsa kohë është në krye të pankinës.
Ndërkohë vet fati i trajnerit hollandez është ende i paqartë, teksa duket se bordi drejtues i United është i ndarë përsa i përket Ten Hag. Në rast se ai shkarkohet, emrat më të të përmendur për ta zëvëndësuar kanë qënë: Thomas Tuchel, trajneri i Brentford Thomas Frank si dhe ish trajneri i Chelsea, Tottenham dhe PSG, Mauricio Pochettino.
