Pas lajmeve të fundit për një largim të mundshëm nga Manchester United, mediat angleze kanë zbuluar se Marcus Rashford nuk dëshiron të largohet nga Old Trafford. Sulmuesi anglez ia ka shprehur këtë dëshirë drejtuesëve të klubit, dhe besohet se është tashmë i fokusuar për të rigjetur formën e tij më të mirë.
Manchester United pritet të pësojë shumë ndryshime në organikën e skuadrës gjatë merkatos së verës. Shumë lojtarë aktualë pritet të largohen, ndërkohë që drejtuesit pritet të sjellin në Old Trafford të paktën një sulmues të ri. E gjithë kjo situatë ka sjellë pasiguri rreth së ardhmes së Rashford tek “Djajtë e Kuq”.
Drejtuesit e klubit e vlerësojnë kartonin e anglezit në shifrat e 70 milionë paundëve. Por për momentin nuk ka asnjë klub europian që është i gatshëm të paguajë këtë shifër për të siguruar shërbimet e Marcus. Francezët e PSG kanë shprehur vazhdimisht interes për talentin anglez, por së fundmi vëmendja e tyre është përqëndruar tek opsione të tjera përsa i përket sulmit.
Një nga arsyet se përse interesi për Rashford nga klubet europiane mbetet i ulët është forma e lojtarit. Sulmuesi nuk ka qënë në formën e tij më të mirë këtë sezon, dhe impakti i tij në fushë për United ka qënë jo ai i dëshiruari. Kujtojmë se Rashford ka shënuar vetëm 8 gola këtë sezon. Megjithatë, sipas të gjitha gjasave anglezi do të jetë pjesë e “Djajëve të Kuq” dhe për sezonin e ardhshëm.
Drejtuesit e klubit janë të besimit se Marcus mund të rigjejë formën e mirë, si dhe të ndihmojë për t’u zhvilluar talentet nga akademia e United, të cilët pritet të marrin më shumë peshë në sezonin e ardhshëm. Sir. Jim Ratcliffe kërkon një ekip të formuar rreth Kobbie Mainoo, Alejandro Garnacho, Willy Kambwala dhe talenteve të tjerë majft premtues, të kombinuar me eksperiencën e Rashford apo Bruno Fernandes.
