Raportimet më të fundit në Angli bëjnë me dije se Arsenal mund të humbasë objektivin e tyre kryesor për merkaton e verës. Bëhet fjalë për sulmuesin e Real Sociedad, Alexander Isak, i cili duket se ka plane të tjera për të ardhmen e tij. Sipas prestigjozes Sport, Arsenal kërkon të afrojë Isak për të zëvëndësuar boshllëkun e lënë pas largimit të Pierre-Emerick Aubameyang.
Por sulmuesi i talentuar Sociedad kërkon të luajë në Camp Nou! Drejtuesit katalanas thuhet se pëlqejnë stilin e lojës së suedezit, dhe besojnë se mund të nënshkruajnë me të për më pak se 64 milionë euro, që është klauzola për prishjen e kontratës së tij aktuale me Real Sociedad.
Skenari ideal për trajnerin Xavi do të ishte transferimi i bomberit të Dortmund, Erling Haaland. Por rrethanat e bëjnë këtë një operacion të vështirë dhe Barcelonës i duhet patjetër një plan B. Afrimi i Isak jo vetëm që do të ishte më pak i kushtueshëm, por dhe një përforcim mjaft i mirë duke parë kualitetin e lojtarit.
Ndërkohë nga ana tjetër, Mikel Arteta duhet të mendojë shpejt për të plotësuar boshllëqet e Arsenal në sulm. Pas largimit të Aubameyang drejt Barcelonës, Alexandre Lacazette dhe Eddie Nketiah gjithashtu pritet të largohen në fund të sezonit, me kosto zero. Në qoftë se Arteta merr një “jo” dhe nga Isak, ky do të ishte sulmuesi i tretë në rradhë që ka refuzuar fanellën e Arsenal në javët e fundit.
Ishte fillimisht Dusan Vlahovic, i cili pavarësisht interesit të madh nga ana e londinezëve, zgjodhi t’i bashkohej Juventus. Arteta më pas i hodhi sytë nga Alvaro Morata, i cili pritej të largohej nga Juventus pas ardhjes në Torino të Vlahovic. Por spanjolli vendosi të qëndrojë në Itali, duke i lënë anglezët me duar bosh.
