Sipas të gjitha gjasave, Antonio Rudiger dhe Andreas Christensen do të largohen nga Chelsea në fund të sezonit. Dy mbrojtësit do t’i bashkohen respektivisht Real Madrid dhe Barcelonës, duke lënë një boshllëk të madh në mbrojtjen e bluve të Londrës. Për këtë arsye drejtuesit e klubit kanë piketuar mbrojtësin e RB Leipzig, Josko Gvardiol, si objektivin kryesor të Chelsea në merkaton e verës.
20 vjeçari shihet si një opsion i mirë për krahun e majtë të mbrojtjes, duke qënë se dhe i përshtatet modulit të lojës që aplikon trajneri Tuchel. Por Josko Gvardiol nuk është alternativa e vetme që drejtuesit e Chelsea po monitorojnë. Jules Kounde i Sevilla, Presnel Kimpembe i Paris Saint-Germain dhe Jose Giminez i Atletico Madrid janë gjithashtu opsione në tavolinë.
Përsa i përket Gvardiol, agjentët e Chelsea kanë monitoruar prej kohësh talentin kroat, që prej shpërthimit të tij me Dinamo. Në të paktën 2 raste përfaqësues të klubit kanë ndjekur nga afër lojtarin, dhe duket se trajneri Tuchel është i bindur për kualitetin dhe potencialin e tij.
Përveç afrimeve të reja, tekniku gjerman mund të kërkojë dhe kthimin e mbrojtësve të huazuar në ekip, për të përforcuar akoma më shumë linjën difensive të Chelsea. Mes tyre janë: Levi Colwill i Huddersfield, Ethan Ampadu i Venezia dhe Dujon Sterling i cili aktivizohet me Blackpool. Ndërsa në mesfushë, objektivat e Chelsea janë mjaft ambiciozë, dhe bëhet fjalë për Declan Rice dhe Aurelien Tchoameni. Konkurrenca është mjaft e fortë për këta të dy dhe sipas të gjitha gjasave Chelsea duhet të heqë dorë nga një prej mesfushorëve të vet, përpara se të hidhet në garë për Rice apo Tchoameni të Monaco. Ndërkohë Conor Gallagher i cili luan si i huazuar te Crystal Palace me shumë mundësi do të rikthehet në klub për sezonin e ardhshëm.
