Mesfushori i talentuar i West Ham, Declan Rice, duket se do të jetë objekt i një gare të fortë, mes klubeve që dëshirojnë kartonin e tij. Manchester United është gati të bëjë një ofertë zyrtare për anglezin, por Chelsea gjithashtu po monitoron situatën e futbollistit. West Ham i ka vendosur një çmim prej 100 milionë paundësh kartonit të lojtarit. Kjo mund të duket si një shifër e ekzagjeruar, por interesimi i klubeve europiane për Rice është mjaft i lartë.
“Djajtë e Kuq” kanë prioritet kryesor përforcimin e mesfushës, me Paul Pogba e ardhmja e të cilit mbetet ende e paqartë. Francezi është skeptik për mundësitë e United për të fituar trofe, dhe eleminimi nga FA Cup nga Middlesbrough ishte një tjetër kambanë alarmi për kampionin e botës. Sipas të gjitha gjasave, ekipi i Ralf Rangnick nuk do të fitojë një trofe madhor deri në vitin e ardhshëm.
Manchester City gjithashtu ka bërë lëvizje konkrete drejt negociatave me West Ham për Rice, por nga të gjitha klubet angleze, mesfushori duket se është më afër transferimit tek Chelsea. Kjo pasi Rice është produkt i akademisë së këtij klubi, prej nga u shkëput në moshën 14 vjeçare, dhe ende ka një lidhje të veçantë emocionale me blutë. Këtë gjë futbollisti e pranoi dhe vet, në një intervistë të dhënë së fundmi për Gary Neville.
Por Chelsea do t’i duhej të hiqte dorë nga shërbimet e N’Golo Kante, për t’i krijuar hapësira Declan Rice. Gjithsesi nuk është e çudtishme nëse trajneri Tuchel e ndërmerr këtë hap, duke qënë se Kante është tashmë në të 30at, ndërsa Rice është një lojtar me më shumë prespektivë për të ardhmen.
Pavarësisht preferencave të tij, Rice është i hapur për një largim nga West Ham, edhe nëse destinacioni nuk është Chelsea.
