Liverpool shpreson që brenda merkatos se janarit, dhe asaj të verës në fund të sezonit, të sjellë në Anfield të paktën 2 mesfushorë të rinj. Humbja e fundit ndaj Brentford në kampionat ishte një tjetër goditje për ekipin e Klopp, dhe një shenjë se përforcimet janë tashmë një nevojë emergjente e klubit.
Pavarësisht kësaj, merkatoja e janarit pritet të jetë një periudhë e qetë në kampin e Liverpool. Kjo dhe për shkak të transferimit të Cody Gakpo nga PSV Eindhoven. Vet trajneri Klopp ka bërë të ditur se klubi nuk ka në dispozicion buxhete të mëdha si rivalët e Manchester City, Manchester United apo dhe Newcastle.
Megjithatë, sipas gazetarit Fabrizio Romano, “The Reds” mbeten të interesuar për kartonin e Jude Bellingham dhe Enzo Fernandez. Të dy lojtarët impresionuan me paraqitjet e tye në Kupën e Botës, por vlera e kartonit të tyre është mjaft e lartë. Borussia Dortmund mendohet se kërkon rreth 130 milionë paundë për Bellingham, ndërkohë që Benfica pretendon 102 milionë paundë për kartonin e Fernandez.
Për momentin këto shifra janë të papërballueshme për Liverpool, por sipas burimeve pranë klubit, drejtuesit e ekipit kanë përpiluar një listë të shkurtër objektivash në merkato, ku sipas tyre mund të bëhet dhe përjashtimi i afrimit në Anfield të më shumë se 1 mesfushori.
Mesfusha është padyshim një nga repartet më problematike të momentit në ekpin e trajnerit Klopp, ku bie në sy mosha e madhe e lojtarëve. Jordan Henderson, Thiago Alcantara dhe Fabinho janë përkatësisht 32, 31 dhe 29 vjeç.
Megjithatë, trajneri Klopp ka ulur entuziasmin në lidhje me merkaton e janarit, duke thënë se si gjithmonë, shumë gjëra do të varen nga financat, dhe nëse kushtet përmbushen për të sjellë një tjetër lojtar të ri në Anfield, ajo do të ndodhë, nëse jo atëherë për momentin nuk do të ketë përforcime.
