Anglezët e Liverpool janë ende duke monitoruar asin e Real Madrid, Aurelien Tchouameni, pavarësisht vështirësisë që paraqet ky operacion. “The Reds” janë të gatshëm të pranojnë edhe një lëvizje në formë huazimi, me shpresën se francezi do të firmosë do të firmosë eventualisht për ta më vonë.
Liverpool ka qënë prej kohësh adhurues i Tchouameni, dhe klubi anglez tentoi të merrte shërbimet e tij në kohën kur lojtari aktivizohej me Monaco. Chelsea gjithashtu shprehu interes për mesfushorin, por Tchouameni eventualisht firmosi për Real Madrid. Lojtari ka patur një sezon të parë të mirë në Spanjë, por shpesh herë nuk është aktivizuar si titullar nga Ancelotti në ndeshjet e mëdha. Tchouameni nuk ishte pjesë e Real në sfidën e parë në Champions League ndaj Manchester City.
Sezonin e ardhshëm, mesfushës së Real pritet t’i bashkohet dhe Jude Bellingham, por Toni Kroos dhe Luka Modric janë në hapat e fundit të karrierës, dhe Tchouameni mund të gjejë më shumë hapësira në ekip. Vet francezi nuk ka shprehur pakënaqësi dhe duket se është i gatshëm të bëjë durim, ndërkohë që drejtuesit e Real gjithashtu nuk duan të heqin dorë prej tij.
Gjithsesi, Liverpool nuk ka ndërmend të heqë dorë nga mesfushori, duke marrë parasysh dhe nevojën e madhe për përmirësime në këtë repart. Megjithatë, “The Reds” kanë gati dhe një plan B nëse operacioni Tchouameni nuk realizohet. Të tjerë mesfushorë nën radarin e klubit anglez janë dhe Mason Mount, James Maddison, Florian Neuhaus, Ryan Gravenberch dhe argjentinasi Alexis Mac Allister.
Jude Bellingham ishte objektivi numër 1 i Jurgen Klopp për merkaton e verës, por duke u nisur nga performanca e Liverpool këtë sezon, si dhe kostoja e lartë e kartonit të anglezit, “The Reds” u tërhoqën nga gara. Bellingham pritet të nënshkruajë me Real Madrid, teksa për termat personale mes lojtarit dhe klubit është gjetur akordi.
