Manchester United pritet të bëjë një tjetër ofertë financiare për Mason Mount, pas refuzimit nga ana e Chelsea të ofertës së tyre të parë. “Djajtë e Kuq” bënë një propozim zyrtar prej 40 milionë paundësh për shërbimet e yllit të Chelsea, por blutë e Londrës refuzuan ofertën. Tashmë, sipas mediave angleze, pritet që United të bëjë një ofertë të re prej 50 milionë paundësh për kartonin e Mount.
Kontrata e 24 vjeçarit me Chelsea skadon në verën e vitit 2024, ndërkohë që e ardhmja e tij është përfshirë nga shumë spekullime në javët e fundit. Liverpool ka qënë gjithashtu në garë për kartonin e anglezit, por duket se ekipi i Klopp ka hequr dorë nga ndjekja e Mount, duke lënë United në “pole-position” për të siguruar firmën e lojtarit të talentuar.
Kujtojmë se Mount ka shënuar 33 gola dhe 37 asiste në 195 paraqitje me Chelsea në të gjitha kompeticionet. Lojtari arriti të fitojë Champions League në vitin 2021, duke shënuar ndaj Porto, dhe Real Madrid, si dhe duke asistuar Havertz në finale në golin ndaj Manchester City. Megjithatë, sezoni që lamë pas ka qënë i vështirë për lojtarin, i cili ka vuajtur nga dëmtimet, si dhe i është nënshtruar një operacioni abdominal.
Para disa muajsh, mediat angleze raportuan se Chelsea i kishte propozuar Mount një kontratë të re, por bisedimet mes lojtarit dhe klubit u ndërprenë. Kjo krijoi idenë se Mount po mendon mbase një destinacion tjetër për të ardhmen e tij.
Manchester United nga ana tjetër gjithashtu është duke ndjekur superstarin e West Ham, Declan Rice, i cili është më pranë një transferimi drejt Arsenal. Megjithatë, “Djajtë e Kuq”, së bashku me Manchester City, janë të gatshëm të hyjnë në lojë në momentin që bisedimet mes Arsenal dhe West Ham nuk shkojnë si duhet.
