Manchester United ka pranuar huazimin e Wout Weghorst deri në fund të këtij sezoni. 30 vjeçari, kartoni i të cilit zotërohet nga Burnley kaloi pjesën e parë të sezonit në Turqi me Besiktas. Mediat angleze raportojnë se futbollisti ndodhet tashmë në Angli, ku pritet t’i nënshtrohet vizitave mjekësore, përpara se United të zyrtarizojë lëvizjen.
Në 16 ndeshje me Besiktas në Turqi, Weghorst ia doli të shënojë 8 gola, si dhe 4 asiste. Goli i fundit i hollandezit erdhi në fitoren 2-1 që Besiktas arriti ndaj Kasimpasa. Në atë sfidë, Wout Weghorst u pa duke përshëndetur fansat në fund të takimit, sinjali ky i parë se një lëvizje drejt United ishte shumë pranë finalizimit.
Afrimi i sulmuesit i jep kështu më shumë opsione trajnerit Ten Hag, i cili kishte dëshpërimisht nevojë për përforcime, sidomos në sulm. Weghorst bëri mjaft bujë në botërorin e Katarit, kur shënoi 2 gola përballë Argjentinës në minutat e fundit të takimit. Ai gjithashtu shënoi nga pika e bardhë gjatë goditjes së penalltive, por Argjentina gjithsesi ia doli të kualifikohej, dhe fitoi në fund trofeun.
Nëse gjithçka shkon si duhet, sulmuesi mund të aktivizohet në kohë për derbin ndaj Manchester City ditën e shtunë në Old Trafford.
Shumë fansa të “Djajëve të Kuq” janë shfaqur skeptikë për aftësitë e Weghorst, duke marrë parasysh se sulmuesi vjen nga kampionati turk, pasi kishte dështuar më parë të kishte impakt në Premier League me Burnley. Gjithsesi, ish-trajneri i Manchester United, Rene Meulensteen është i bindur se Ten Hag e di se çfarë po bën në krye të pankinës.
Meulensteen tha se sulmuesi hollandez është zgjidhja perfekte për nevojat afatshkurtra të United, deri në merkaton e verës. Sidomos duke marë parasysh karakterin luftarak dhe mjaft punëtor të Weghorst, i cili do dojë të provojë vlerat e tij në Old Trafford. Ish-trajneri i klubit anglez komentoi:
“Ai është ndryshe, kjo është dhe arsyeja se përse Ten Hag e ka sjellë këtu. Ai ofron diçka tjetër, që sulmuesit e tjerë të United nuk e ofrojnë, por, nuk mendoj se do të jetë titullar në çdo ndeshje.”
