“Mbreti i Afrikës” i hap derën Real Madrid dhe Barcelonës! Ky ka qënë tituli i Goal.com që ka zbuluar se sulmuesi i Liverpool, Sadio Mane, është i gatshëm të largohet nga Anfield, në rastin e një oferte nga gjigandët spanjollë.
Lojtari sapo është shpallur kampion i Afrikës, pasi Senegali fitoi për herë të parë në histori trofeun e AFCON. Por Mane nuk dëshiron që ta mbyllë karrierën e tij pa realizuar dhe ëndrrën e tij të fëmijërisë, të luajë për një nga ekipet “big” të Spanjës. Burimet bëjnë me dije se sengalezi ia ka bërë të qartë këtë dëshirë agjentit të tij, i cili do të shqyrtojë opsionet që futbollisti ka në verë.
Një nga arsyet se përse Mane dëshiron të ndryshojë skuadër, është për të luftuar për statusin e futbollistit afrikan më të mirë në histori. Lojtari e di se ka bërë historinë me Liverpool, por nëse lufton për kampionatin dhe Champions League-ën e tij të dytë diku tjetër, kjo do ta vendoste Mane në të njejtin rank me legjenda si Eto’o, Drogba apo Weah.
Deri më tani nuk ka patur kontakte mes Mane dhe Liverpool për një mundësi rinovimi. Në të njejtën kohë, transferimi i kolumbianit Luis Díaz në Anfield është një vështirësi e shtuar për Mane. Kjo pasi ish-lojtari i Porto aktivizohet në të njejtin pozicion me senegalezin.
Në vitin 2017 Mane u tundua nga Real Madrid, teksa trajneri Zidane kërkonte transferimin e tij në Madrid. Por asokohe francezi u largua nga stoli i galaktikëve dhe operacioni dështoi. Në vitin 2019 Real bëri një tjetër përpjekje për afrimin e sulmuesit por pa sukses. Barcelona gjithashtu ka mbajtur nën vëzhgim Mane disa vite më parë, por transferimi nuk u realizua dot për shkak të mos-dakordësive financiare.
