Real Madrid është në një fazë të avancuar të bisedimeve me talentin e Borussia Dortmund, Jude Bellingham. Gjigandët spanjollë mësohet se kanë rënë dakord përsa i përket termave personale me anglezin, dhe do të sigurojnë shërbimet e tij për shumën e 100 milionë eurove.
Mesfushori iu bashkua Borussia Dortmund në vitin 2020 nga ekipi i Birmingham City, dhe ka shkëlqyer me paraqitjet e tij në Bundesliga që prej atij momenti. Bellingham gjithashtu ishte një nga lojtarët më të mirë të kombëtares angleze në kupën e botës në Katar. Real Madrid është i gatshëm të paguajë 100 milionë euro për shërbimet e asit të Dortmund, pavarësisht se drejtuesit e klubit gjerman mendohej se kërkonin rreth 150 milionë euro për anglezin.
Në spanjë janë të bindur se Bellingham do t’i bashkohet Real në fund të këtij sezoni, por Manchester City është ende në garë për shërbimet e lojtarit. Kjo është arsyeja se përse drejtuesit e Real Madrid po mundohen të zyrtarizojnë marrëveshjen sa më shpejt të jetë e mundur, për të shmangur surpriza të momentit të fundit. Trajneri i Manchester City, Pep Guardiola, ka shprehur së fundmi lëvdatat e tij për talentin e Borussia Dortmund, duke lënë të kuptohet dëshirën e tij për ta patur atë në klub.
Liverpool nga ana tjetër është tërhequr nga gara për kartonin e Bellingham. Shkak kryesor mendohet të jetë kostoja e lartë financiare e operacionit, si dhe momenti i vështirë që “The Reds” po kalojnë. Vet trajneri i Liverpool, Jurgen Klopp, u shpreh se interesi i klubit për Bellingham i përngjan “një fëmije që kërkon një Ferrari për krishtlindje”, duke ilustruar kështu pamundësinë e Liverpool për të qënë pjesë e garës.
Mesfushori ka luajtur 40 ndeshje për Dortmund këtë sezon, duke ia dalë të shënojë 11 gola, si dhe 7 asiste.
