Manchester United po tregon interes gjithnjë e në rritje për mesfushorin difensiv të Sporting Lisbon, Joao Palhinha. Përfaqësues të “Djajëve të Kuq” kanë udhëtuar drejt Portugalisë, për të parë lojtarin në aksion, plot 8 herë gjatë këtij sezoni. Sipas të gjitha gjasave oferta zyrtare e anglezëve nuk do të vonojë, por konkurrenca për Palhinha është e madhe.
United ndoqi në mënyrë aktive performancat e mesfushorit dhe gjatë verës së kaluar. Gjithsesi, anglezët u stepën nga shuma që Sporting kërkoi në këmbim të shërbimeve të tij, plot 33 milionë paundë. Por tani thuhet se Sporting ka ulur çmimin e kartonit të futbollistit në 25 milionë paundë.
Gjithsesi, United do të duhet të luftojë me Tottenham, Wolves dhe në të njejtën kohë pronarët e pasur të Newcastle, të cilët janë të gjithë të interesuar për shërbimet e Palhinha. Mediat portugeze bëjnë me dije se dëshira e lojtarit është t’i bashkohet një klubi në Premier League, dhe sipas të gjitha gjasave do të jetë një nga ekipet e përmendura.
United është shtëpia e patriotëve të Palhinha, Cristiano Ronaldo dhe Bruno Fernandes. Ky i fundit gjithashtu erdhi nga Sporting Lisbon në vitin 2019. Ndërsa Ronaldo gjithashtu u bë pjesë e United nga Sporting Lisbon në vitin 2003, përpara se t’i bashkohej më pas Real Madrid, dhe në fund të kthehej përsëri tek United.
Trajneri i Sporting Lisbon, Ruben Amorim, dëshiron që Joao të vazhdojë të jetë pjesë e skuadrës, por çdo ditë që kalon kjo duket gjithnjë e më e pamundur.
Ndërkohë, një tjetër objektiv i United në merkaton e ardhshme mendohet se është Nordi Mukiele. Mbrojtësi i RB Leipzig është nga lojtarët e preferuar të Ralf Rangnick, i cili beson fort te aftësitë e francezit. Nëse tekniku arrin të bindë Mukiele që t’i bashkohet “Djajëve të Kuq”, mbrojtësi do t’i bëjë konkurrencë Aaron Wan-Bissaka dhe Diogo Dalot, që luajnë në të njejtin pozicion.
