Drejtori i Shakhtar Donetsk, Sergei Palkin, ka konfirmuar se momentalisht janë duke u zhvilluar bisedime me Arsenal, në lidhje me transferimin e mundshëm të Mykhaylo Mudryk. Mediat angleze raportuan para disa ditëve se klubi ukrainas kishte refuzuar ofertën e parë të Arsenal, që konsistonte në 55 milionë paundë, por topçinjtë duket se nuk kanë ndërmend të dorëzohen.
Përsa i përket lojtarit, dëshira e Mudryk është që t’i bashkohet Arsenal, teksa sulmuesi ka postuar së fundmi disa video të klubit londinez, në rrjetet e tij sociale. Megjithatë, është tashmë e qartë se londinezët do të duhet të rrisin ofertën e tyre, nëse duan që Mudryk të luajë në Emirates.
Mediat angleze bëjnë me dije se Arsenal ka rënë dakord për termat personale me lojtarin, dhe tani po diskutohet vetëm shifra e transferimit. Drejtori i Shakhtar Donetsk u shpreh ditën e djeshme:
“Negociatat po vazhdojnë. Po marrim oferta, por nuk janë ato që ne presim. Tani për 5 minuta do të bisedoj në telefon me Arsenal. Jemi të hapur të shkëmbejmë ide dhe shifra. Nëse biem dakord le të jetë kështu, nëse jo, atëhere le të ndodhë në një moment të dytë.”
Sipas raportimeve të Sky në Angli, drejtuesit e Shakhtar Donetsk po përdorin transferimin e Antony tek Manchester United për shifrën e 86 milionë paundëve si pikë krahasimi, duke pretenduar se Mudryk është një lojtar akoma më i mirë. Gjithsesi, drejtuesit e klubit ukrainas janë të ndërgjegjshëm për faktin se talenti eventualisht do të largohet drejt një klubi të madh europian.
Kjo është dhe arsyeja se përse Mikel Arteta gjithashtu insiston në kompletimin e lëvizjes në janar, duke qënë se Mudryk është në radarin e shumë klubeve rivale. Për më shumë, shërbimet e tij bëhen akoma më të nevojshme duke marrë parasysh dëmtimin e Gabriel Jesus.
