Ish-trajneri i kombëtares belge, Roberto Martinez, është emëruar si trajneri i ri i Portugalisë. Spanjolli zëvëndëson kështu veteranin Fernando Santos, i cili dha dorëheqjen në përfundim të Kupës së Botës. Kombëtarja portugeze u eleminua në çerek-finale nga Maroku. Martinez ndërkohë gjithashtu dha dorëheqjen nga drejtimi i Belgjikës, pas eleminimit të tyre nga botërori i Katarit.
Trajneri i ri i Portugalisë u shpreh:
“Jam shumë i lumtur të përfaqësoj një nga kombëtaret me talentet më të mira në botë. Jam shumë i emocionuar që jam këtu. Që kur fola për herë të parë me presidentin e federates e dija se ky do të ishte një projekt që do të ngjallte shumë interes tek unë.”
Martinez shtoi:
“E kuptoj se pritshmëritë janë të mëdha dhe objektivat madhore, por kemi të bëjmë me një grup fantastik këtu te federata dhe së bashku mund t’i arrijmë këto objektiva…Pika ime e nisjes do të jenë 26 lojtarët që luajtën në Kupën e Botës, dhe Cristiano Ronaldo është një prej tyre.”
Trajneri gjithashtu tha se do t’i marrë vendimet e tij “në fushë dhe jo në zyrë”, duke iu referuar rëndësisë së lojtarëve dhe shansin e tyre për të qënë titullarë tek Portugalia nën drejtimin e tij.
Përveç eksperiencës ndërkombëtare, Martinez gjithashtu ka shpenzuar 4 vite tek Wigan në Angli, ku ia doli të fitonte dhe FA Cup në vitin 2013. Më pas tekniku iu bashkua Everton për 3 vite, ku në njërin prej sezoneve ia doli të renditej i pesti me ekipin e tij në Premier League. Roberto u caktua në krye të Belgjikës në vitin 2016, dhe kombëtarja arriti kulmin e vet në vitin 2018 në botërorin e Rusisë, ku u rendit e treta.
Mbetet të shohim se si do të shkojë aventura e Martinez në krye të Portugalisë.
