Chelsea është duke monitoruar zhvillimet e fundit tek Everton, në lidhje me Dominic Calvert-Lewin. Sulmuesi ka tërhequr vëmendjen e shumë klubeve europiane, pas paraqitjeve mjaft të mira në Premier League, sezonin që lamë pas. 27 vjeçari është mes disa alternativave që blutë e Londrës po konsiderojnë, për të përforcuar repartin e sulmit në prag të sezonit të ardhshëm.
Një emër tjetër në listën e Chelsea është Benjamin Sesko i RB Leipzig. Sesko gjithashtu ka tërhequr vëmendjen e shumë klubeve këtë sezon. Sipas mediave angleze, Arsenal është në bisedime me lojtarin, ndërkohë që Manchester United gjithashtu ka bërë të ditur interesin e vet. Ndërkohë, 21 vjeçari thuhet se ka refuzuar 2 oferta nga Arabia Saudite, dhe nuk është i interesuar për një lëvizje të tillë, në këtë moment në karrierën e tij.
Gjithashtu duhet përmendur se aspekti financiar pritet të luajë një rol të rëndësishëm në zgjedhjen e Chelsea. Kartoni i Sesko do t’i kushtonte bluve të Londrës më shumë sesa ai i Calvert-Lewin. Lojtari i Leipzig vlerësohet në shifrat e 59.5 milionë paundëve.
E vetmja mënyrë që Chelsea të sigurojë fondet e nevojshme, duke respektuar rregullat e Premier League, është shitja e disa prej lojtarëve aktualë në Stamford Bridge. Drejtuesit e klubit shpresojnë të përfitojnë të ardhura nga shitja e Romelu Lukaku dhe Armando Broja. Trevoh Chalobah dhe Conor Gallagher gjithashtu mund të largohen gjatë kësaj merkatoje.
Monaco, Wolves dhe Bologna kanë shprehur interesin e tyre për Broja.
Për Lukaku, klubet e Arabisë Saudite kanë shprehur interesin e tyre, dhe sipas burimeve afër lojtarit, ai është i gatshëm të konsiderojë këto opsione. Ndërkohë, Napoli gjithashtu duket se po monitoron situatën e Lukaku. Sulmuesi ka një klauzolë për prishjen e kontratës që përllogaritet në vlerën e 38 milionë paundëve. Mbetet të shohim se cila do të jetë lëvizja e bluve në vijim.
