Manchester United, Arsenal dhe Liverpool janë të gjithë duke monitoruar mesfushorin e talentuar të Wolves, Joao Gomes. Braziliani ka impresionuar me parqitjet e tij në pjesën e parë të sezonit në Premier League, dhe kjo ka ngjallur interesin e shumë klubeve rivale, por dhe skuadrave të tjera në Premier League.
Gomes ka një kontratë aktive me Wolves deri në vitin 2028, dhe kjo e vendos klubin në një pozitë mjaft të mirë për të negociuar me këdo që kërkon kartonin e tij. Kujtojmë se mesfushori është aktivizuar si titullar në gati të gjitha sfidat e luajtura këtë sezon, dhe ka rënë në sy me paraqitjet e tij, së bashku me brazilianin tjetër Matheus Cunha. Drejtuesit e Wolves janë shumë pranë arritjes së një marrëveshjeje me Cunha për një kontratë të re, dhe duan të sigurohen se Gomes gjithashtu do të vazhdojë të jetë pjesë e klubit në planin afatgjatë. Kujtojmë se Joao Gomes iu bashkua Wolves nga brazilianët e Flamengo në janarin e vitit 2023 për shifrën e 15 milionë paundëve.
Wolves janë mposhtur vetëm 1 herë në 4 takimet e fundit, duke iu larguar zonës së rënies nga kategoria në Premier League. Fitorja 2-0 ndaj Manchester United i dha mjaft motivim ekipit për të vazhduar në rrjedhën e rezultateve pozitive. Kjo u konfirmua dhe nga trajneri i ri i skuadrës, Vitor Pereira, i cili konfirmoi momentin e mirë që Wolves po kalon:
“Një person që ka vetëbesim mund të bëjë shumë gjëra. Në këtë moment, skuadra është e lumtur, energjia është pozitive…”
Tek Wolves, Gomes apo Cunha nuk pritet të largohen në janar, por në fund të sezonit, brazilianët do të kenë disa mundësi mjaft tunduese, për të nisur një kapitull të ri në karrierën e tyre. Deri në atë moment mbetet të presim.
